I-DOWNS ENGCUPHENI YOKUNIKWA ISIGWEBO
Isiwengu sigadle kumqeqeshi wepirates
UDUNGWE yizinxushunxushu umdlalo wemamelodi Sundowns ne-orlando Pirates we-absa Premiership ophele ngo-0-0 izolo ngomgqibelo ntambama eloftus Versfeld Stadium, etshwane.
Lo mdlalo uxoveke ungakaqali njengoba onogada besundowns bevimbe ibhasi ebelithwele ipirates. Lokhu kuholele ekutheni kugcine sekubanjwana ngezandla, okwenze abadlali bangena ensimini sebephuke imimoya.
Lo mdlalo ubukhungethwe yizigameko zokudlalisana kabi, kanti uxola Mlambo wepirates nguyena abebemjuqa kakhulu abadlali bedowns njengoba eqalwe nguHlompho Kekana waphinde wahlaselwa ngugaston Sirino.
Ukushuba kwalo mdlalo kuholele ekutheni kube khona umlandeli wedowns ogulukudela enkundleni. Lo mlandeli uqonde ngqo kurhulani Mokwena ongumsizi womqeqeshi kwibucs, wamhlohloloza. Lokhu kucike kakhulu ibhentshi lebucs elivele lamthela isibhaxu lo mlandeli. Ugcine esezwelwa yibhentshi ledowns elihlasele elebucs. Upitso Mosimane ocija idowns nguyena obephambili evikela lo mlandeli.
Nokho-ke ngemuva komdlalo usigxekile isenzo salo mlandeli.
“Akukuhle lokhu okwenziwe ngumlandeli kurhulani. Nokho-ke isimo sedowns norhulani asisihle ngenxa yendlela ahambe ngayo. Abanye abantu akulula ukwamukela isimo sakhe njengoba kwenzeka kwabanye bethu. Izixakaxaka ziyalindeleka emidlalweni emikhulu ngalolu hlobo.
"Nangesikhathi sihlula yona ipirates ngo-6-0 abantu bahluthukelwa yizinhliziyo banqamula izintambo zikamabonakude,” kusho umosimane.
Ephawula ngomdlalo umosimane uthe: “Sikwenze konke ebesikuhlelile. Sidlale kahle, kodwa sangawakhanda amathuba acacile okuvalela amagoli. Inhloso yethu bekuwukuvala umlambo noben Motshwari esiswini. Sikwenzile lokhu, kodwa salinyazwa wukulimala kuka-andile Jali. Nokho-ke sizamile ukubamba isisu yize bese engasekho. Ukulinyalelwa ngabadlali ngalolu hlobo akukuhle njengoba novilla (usibusiso Vilakazi) esalimele. Besibhekene nekilabhu enzima kakhulu.
"Ngimethulela isigqoko umilutin Sredojevic ocija ibucs ngomsebenzi omuhle awenzayo. Ipirates isingcono kakhulu manje, kodwake besingeke siyivumele izobhiyoza enkundleni yethu njengoba ihlale yenza. Sisuka kude kakhulu nomicho. Besinobudlelwane obuhle naye kusukela ngisacija isupersport United.
"Ubalwa nabaqeqeshi abayisihlanu abahamba phambili e-afrika. Udennis Onyango ongunozinti wethu ngimnikezwe nguyena umicho,” kusho umosimane.
Umicho uthe uphoxekile ngokuhlaselwa kukamokwena.
“Umokwena uyisebenzele kanzima isundowns, kodwa usezohlaselwa ngalolu hlobo. Nokho-ke umdlalo ubusezingeni eliphezulu. Umosimane ubesidlala ngomqondo. Ngicabanga ukuthi lo mphumela uwafanele womabili lama kilabhu. Womabili amakilabhu adlale kahle, yikhona nje wukuthi kayikho evakashele inethi,” kusho umicho.
Uthembinkosi Lorch obeyiphela endlebeni ezitobheni zedowns, uqokwe njengomdlali ovelele kulo mdlalo. Lo mdlali ubalise kakhulu ngamaqhinga okubaxova imimoya asetshenziswe yidowns kulo mdlalo, ikakhulukazi ukubavimbela ukungena enkundleni. Ipremier Soccer League (PSL) kulindeleke ukuba icwaninge umbiko kanondweba ngakho konke okwenzeke kulo mdlalo bese ithatha isinqumo. Idowns ingase ihlawuliswe kanzima ngesenzo sayo kwazise yiyona ebidlalela ekhaya. Komunye umdlalo we- pre
miership, ilamontville Golden Arrows ihlulelwe ekhaya yibaroka kuba ngu-2-1 izolo ntambama eprincess Magogo Stadium, Kwamashu.
Amagoli okunqobe ngawo ibaroka avalelwe ngujemondre Dickens novusi Sibiya kwathi eleArrows okuyiyona elivalele kuqala lishaywa ngulerato Lamola.