Uprince Kaybee umangaze unina
Umthengele unyanyavu lwemoto
KUTHINTEKE abantu abaningi bebona unina wesihlabani somculo ekhala mi izinyembezi ngesikhathi emukela isipho abengasilindele semoto kanokusho endodaneni yakhe.
Unina kakabelo Motsamai, owaziwa kakhulu ngelikaprince Kaybee kwezikaqedisizungu, uthengele unina imoto entsha ceke yohlobo oluphambili, imercedes Benz emnyama.
Ezithombeni nakwi- video efakwe nguprince Kaybee ekhasini lakhe enkundleni yokuxhumana, i- Instagram, kuyabonakala uku- thi unina umangele futhi uphelelwa ngamazwi. Ubesengena ngaphakathi emotweni yakhe wabamba i- steering wheel, wakhala.
Lezi zithombe ne- video kuhambisana nombhalo kaprince Kaybee othi: “Sho Oulady, nasi isipho sakho sikakhisimuzi ozoya ngaso ezitolo. Ngiyaxolisa ukuthi angikwazanga ukufika ngizokunikeza sona ngokwami.”
Uqhube wathi: “Ingxenye lapho ukhala khona ingephula umoya ngoba kungekudala ubungadli ukuze kudle mina.”
Uphinde wabonga nakubalandeli bakhe, wathi yibo abenze ukuba akwazi ukupha unina lesi sipho.
ILANGA Langesonto lizamile ukuxhumana noprince Kaybee kodwa wangatholakala njengoba ucingo lwakhe belukhala lungabanjwa kwaze kwashaya isikhathi sokushicilela.
Kuyimanje leli ciko aliconsi phansi kubalandeli balo ngezingoma ezinohlonze futhi ezithandwayo kuleli, enye yazo apike kuyona ubusiswa esihloko sithi “Banomoya”, ebalwa nezingoma ezingase zehlukanise unyaka.
Uprince Kaybee uzalelwe wakhulela efree State kodwa usenomuzi endaweni yabadla izambane likapondo ehillcrest, ethekwini.
makhoba@ilanganews.co.za