UMNYANGO UZOQOQA INTSHA NGENGOMA
KUZOSETSHENZISWA imicimbi yengoma yesintu ukwenza abantu abasha babe matasa, baqhelelane nezimo ezingagcina zibaholele ezingozini kulawa maholide.
Kuyaziwa ukuthi nakuba kuyisikhathi senjabulo lesi kodwa ziningi izehlakalo ezimbi ezivelayo njengezingozi zemigwaqo, ukugwazana, izimpi zokucwasana, nokusetshenziswa budlabha kophuzo oludakanayo.
Ungqongqoshe wezobuciko, amasiko, nezemidlalo KwazuluNatal, ubongi Sithole-moloi, emcimbini obusemhlali Golf Club, wethule izinhlelo abanazo kulo nyaka abantu abasha abazochitha ngazo isithukuthezi, bazijabulise. Kulezi zinhlelo kubalwa ezemidlalo eyahlukene, nengoma.
Kujwayelekile ukuba ngalesi sikhathi sonyaka imicimbi yengoma yesintu ithi chithi saka ezindaweni ezahlukene kwazise abantu basuke bebuyele emakhaya.
Emasontweni amabili edlule ubehambele egoli ukuyokwethula ngokusemthethweni umcimbi wengoma yasemachunwini, emsinga. Eminye imicimbi yengoma seyenziwe yedlula njengowasembongolwane ngaphansi kweking Cetshwayo District neyaseclermont ehostela EKK, ethekwini.
Ezilandelayo ngeyaserich- mond, ngeyakwamafunze, ngeyasemsunduzi, ngeyakwahlabisa - zizokwenzeka zonke ngomhlaka-15 kwephezulu. Kuzolandela eyasemhlumayo mhlaka-20, eyasembumbulu ethekwini mhlaka-22, eyasezicole ngaphansi komzinyathi mhlaka-23, eyaseNkonjeni olundi mhlaka-25, eyasefolweni mhlaka-27.
Mhlaka-28 kuzokwenziwa eyasemfongosi ngaphansi komzinyathi, eyasemsinga kuwo umzinyathi, neyasemachunwini emsinga. Eyakwadumisa ogwini izoba mhlaka-29. Mhlaka-30 kuyogoqwa ngeyakwanibela entelukabayise Hall, ngeyaseqhudeni ngaphansi komzinyathi neyaseMkhanyakude.
Ngale kwemicimbi yengoma kunamafestivali azosetshenziswa ukuqhakambisa ikhono labaculi abasafufusa, nalawo okuhloswe ngawo ukugqugquzela ubumbano ngalesi sikhathi sonyaka.
Kuleyo micimbi kubalwa noMkhosi woselwa Kwanongoma kusukela mhlaka-19 kuya kumhla ka-23.
“Siyethemba ukuthi ngokuvulela intsha lawa mathuba sizokwenza umehluko obonakalayo ukuqinisekisa ukuphepha ngalesi sikhathi samaholide nokuqinisekisa ukuthokoza okulawulekile kwizakhamizi nakwizivakashi. Sinxusa ukuba abantu bangaphuzi bese beshayela izimoto noma bayobhukuda,” kusho ungqongqoshe.
zowakha@ilanganews.co.za