Esezenkolo sihloniphe abaholi ngeziqu
BEKUNGABA kuhle ukuba amakhrestu ake azinike umzuzu abheke ukukhula kwezingane zaphambilini nezikhula esikhathini samanje, bese ebuka umehluko ukuthi ungakanani lapho, kuthi uma esewutholile azibuze ukuthi ngabe kukuphi lapho konakele khona ukuze kulungiswe.
Ukhulume kanje umnu Chris Ndlela owake waba yimeya kumasipala wasemsunduzi emgungundlovu ngomgqibelo kusihlwa emcimbini wokuhlonishwa ngeziqu zobudokotela kosopolitiki, osomabhizinisi neminye imikhakha evelele, obuhlelwe yisikole sezenkolo inational Congregational School of Theology and Community Development (NCST&CD), ikomkhulu laso elisemgungundlovu.
Kulo mcimbi obuhlelwe nguRector walesi sikole, u-archbishop Sol Zwelonke Makhathini, obuse-a.f Wood Hall, edolobheni emgungundlovu, kuhlonishwe yena umnu Ndlela, umnu Willies Mchunu ongundunankulu wakwaZulu-natal, umnu Themba Njilo oyimeya yasemsunduzi nomnu Truman Magubane oyichief Whip khona kumasipala wasemsunduzi, Inkosi yakwambotho eharding undlunkulu Nokwazi Mbotho, ababhishobhi nabanye abaholi abehlukene.
Umnu Mchunu nomnu Njilo abaphumelelanga kulo mcimbi kodwa bathumele izithunywa ebezivela emahhovisini abo ukuba ziyobamela lapha.
Umnu Magubane obehlonishwa lapha wake wadonsa isigwebo seminyaka ewu-15 ejele e-robben Island ngesikhathi sikahulumeni wengcindezelo lapho ayegqunywe egunjini elilodwa khona nomnu Kgalema Motlante owake waba ngumengameli waseningizimu Afrika ngaphansi kukahulumeni wentando yeningi.
Bonke laba abebehlonishwa bebebongwa ngeqhaza labo abali- bambile ekuthuthukiseni abantu bakwazulu-natal ngokwezinhlaka abaphuma phansi kwazo.
Ethula inkulumo, udean Chief Cardinal Archbishop Sol Puseletso Matlotlo owushansela wezikhungo zezenkolo ezingu-46 ezilapha eningizimu Afrika, ubonge abaholi abebehlonishwa lapha ngokuzinikela kwabo ekuthuthukiseni umphakathi.
Uphakamise ukuba kube khona ifederal yezikole zezenkolo zalapha eningizimu Afrika ngenhloso yokunqanda abagcotshwa ukuba bangazibekeli imithetho emabandleni abawaholayo okuthiwa eminye yayo igcina iphendula inhlekisa ibandla likakhristu lize lingene ehlazweni.
Uthe le federal izophinde iqinise nobunye babefundisi ngokuba bazane, bangaklolodelani kumbe banyundelane njengoba beyimihlathi engazani.
“Ukuze siqine okholweni sidinga ukuba ne- federal vision eyodwa ukuze sibe yibandla elilodwa elingumzimba kakhristu.
"Ngokwenze njalo sizokwazi ukulwa ndawonye impi yezulu ngoba lapha asibambene ngegazi nenyama kodwa silwa nempi yasemkhathini.
"Befundisi masihlanganeni sihlabelele ingoma eyodwa, sivume ukuthi ukhristu uyinkosi, singadayisi ngevangeli,” usho kanje.