Ibhizinisi lokudla uzolisheba nomculo
U-cinderella ufisa ukusebenza nodj Tira nobabes Wodumo
ISIPHALAPHALA sentokazi engumculi esifufusayo kulo mkhakha sithi sizoxuba ibhizinisi lokudayisa ukudla nomculo. Urethabile Sello, odume ngelikacinderalla kulo mkhakha, uthi ngeke alilaxaze ibhizinisi lakhe lokudayisa ngokudla nakuba esegxile emculweni.
Lo mculi, odabuka ematatiele, unesitolo esidayisa ukudla okuphekiwe esibizwa ngehot Pot, esisenkabeni yetheku, kanti yilo leli bhizinisi elimvulele amathuba okuzibona ukuthi angakwazi ukucula. Ekhuluma NELANGA Langesonto, lo mculi uthi ufikelwe wumcabango wokungena emculweni ngemuva kokuba abanye abanikazi bezitolo eziseduze kwesakhe bemcela ukuba abamakethele nawabo amabhizinisi embhobheni njengoba ebenza kwelakhe.
“Mina bengikhuluma kwi- mic, nginxenxa abantu ukuba bazongena bathenge esitolo sami sokudla nokuyilapho abanye osomabhizinisi bengitshele ukuthi bayalithanda iphimbo lami,” kusho lo somabhizinisi othi ngaleso sikhathi ubesuke ezikhulumela nje, enganakile ukuthi kukhona asebeqaphela iphimbo lakhe.
Uthi uqale wenza ingoma esihloko sithi “Tamatiso” ayidlale kwi- speaker sakhe abantu bayithanda.
Uthi ube esebona ukuthi nebala likhona ithalente futhi abantu bayayithanda into ayenzayo.
Lo mculi usanda kukhipha ezinye izingoma ezimbili ezithokozelwa kakhulu ezindaweni zobumnandi, esihloko sithi “I’m Happy” nenye ethi “Wabhuquza Uyasala”.
Uthi useke wasebenza nabantu abafana noskyy Wanda nogukwa kanti unesifiso sokusebenza nabantu abafana nobabes Wodumo nodj Tira.
Uthi okwamanje akajahile ukukhipha i-albhamu egcwele njengoba esazama ukufaka umculo wakhe kubantu.
“Kungenzeka ngokuhamba kwesikhathi ngonyaka ozayo ngikhiphe i-albhamu egcwele. Okwamanje izingoma zami zitholakala kuzo zonke izinkundla zobuchwepheshe ezidayisa ngomculo,” kusho yena.
lucky.cain@ilanganews.co.za
Bengikhuluma kwi-mic nginxenxa abantu ukuba bazothenga esitolo sami.