ISICELO SABALANDELI NGOBHELE
ABALANDELI bamazulu FC basamdinga enkundleni usiyabonga “Bhele” Nomvethe ongumgadli wale kilabhu okulindeleke ukuba abeke amakhokho ethala uma kusongwa le nyanga kazibandlela (December).
Usuthu luzobhekana nebloemfontein Celtic kowe-absa Premiership ngolwesithathu ngo-19h30 eking Zwelithini Stadium, emlazi.
Usuthu luya kulo mdlalo nje, lusanda kugila izimanga lunqoba imidlalo emibili yasekuhambeni obelunganikwa lutho kuyona.
Luhlule ihighlands Park ngo-21, lwase luxoshisa umqeqeshi u-eric Tinkler luhlula ichippa United ngo-1-0.
Lusukile emsileni we- log emuva kokunqoba le midlalo, nokho alukasindi ezembeni.
Leli phephandaba lithole ukuthi kunabalandeli bosuthu abahlela ukuyohlangana nabaphathi bosuthu ngenhloso yokubacela ukuba unomvethe angawabeki manje amakhokho ethala kodwa kulindwe kuze kuphele isizini kwazise babona esazodingeka.
Kuthiwa babona kuzobadalela enkulu ingozi uma bengavumela ukuthi unomvethe ahambe manje.
Umlandeli oshayele leli phephandaba, ocele ukuba lingavezwa igama lakhe, uthe: “Asisalwi manje ekilabhini ngikholwa wukuthi abaphathi sebekuqonda kahle ukubaluleka kwethu.
"Sihlela ukuyohlangana nabo sibacele ukuba belule inkontileka kanomvethe kuze kuphele isizini.
"Ukumdedela kwethu manje kuzosidalela enkulu inkinga njengoba singakasindi ezembeni.
"Sisizwe nguyena emdlalweni wehighlands Park ngakho-ke asikwazi ukumdedela manje.
"Siyacela kubaphathi bekilabhu ukuba basicabangisise kahle isicelo sethu, lo muntu usahlula inqwaba yabadlali kwipsl,” kusho lo mlandeli.
Leli phephandaba lishayela ubrilliant Mkhathini wezokuxhumana osuthwini ngalolu daba, uthe: “Siyasibona nathi isimo sikaNo-mvethe, asithule ngamabomu ku-ningi okufanele kwenzeke.
"Unomvethe uyohlezi engunomvethe ngeke umfanise namuntu, kodwa-ke kuzofanele kuhlale phansi izinhlangothi zombili kuvunyelwane.
"Siyacela kubalandeli ukuba bangajahi, lezi zinto zithatha isikhathi futhi siyaqonda ukuthi bona bafuna izinto zenzeke ngokushesha kodwa lolu daba ludinga ukuhlalelwa,” kusho umkhathini.