ESKHALENI:
KUMELE izinuke amakhwapha ikaizer Chiefs ngokuqhubeka nokungakukhathaleli ukwenza kahle emidlalweni yecaf.
Ichiefs ingene kwelikhulu ihlazo ihlulwa yikilabhu engenamlando izimamoto ngo-2-1 emlenzeni wesibili wecaf Confederation Cup ekuhambeni.
Okubi kakhulu ngokuhlulwa kwezimpofana wukuthi zihlulwe yikilabhu edlalela ukuchitha isizungu ekubeni ichiefs ibalwa namakilabhu ahlonishwayo e-afrika. Ichiefs sekukaningi ikhombisa ukungabi nandaba nemidlalo yaseAfrika. Imamelodi Sundowns neOrlando Pirates basebenze kanzima ukuze iningizimu Afrika ithole izikhala eziningi kwicaf Champions League nakwicaf Confederation Cup. Ifree State Stars nayo yehlise isithunzi sezwe ikhishwa kusahlungwa uvucu kwiConfederation Cup yize inabadlali abanesipiliyoni sokudlala e-afrika kubalwa urooi Mahamutsa nopatrick Phungwayo.
Kumqoka ukuba ichiefs izikhandle emidlalweni yase-afrika kwazise iyikilabhu enkulu kakhulu futhi enomthwalo wokuhlinzeka ibafana Bafana ngabadlali abanokhakhayi oluqinile.
Ibafana kayisoze yenza kahle emiqhudelwaneni emqoka nxa ikilabhu enkulu njengechiefs ihudula izinyawo ukujwayeza abadlali ukunqamula amazwe aseAfrika.
Akubukeki kahle ukuthi ichiefs isebenzise abadlali abangajwayele ukudlala emidlalweni yecaf. Lokhu nje kukodwa kukhombisa ukuyibukela phansi imidlalo yaseAfrika. Amakilabhu abevika ngokubanjwa inkunzi kabuhlungu emidlalweni yecaf. Manje kalisekho ihawu lokuvika njengoba icaf ingalivezi izinyo konompempe abapheka imiphumela yemidlalo. Le nhlangano isixoshe inqwaba yonondweba abebesolwa ngokupheka imiphumela yemidlalo. Nokho isenenselelo yokuqinisekisa ukuthi amakilabhu athola impatho efanele emidlalweni yasekuhambeni njengoba amanye amakilabhu ehlukunyezwa nxa evakashile.
Nokho siyawubona umehluko kwicaf selokhu izintambo zithathwe ngu-ahmad Ahmad waseMadagascar. Phela le nhlangano ibiyihlaya ngaphansi kobuholi obusanda kuphuma. Amakilabhu akuleli abehlukunyezwa, icaf ithalalise nxa ibikelwa.