Imbibizane kungizwe okhozini
Kuthiwa usemisiwe emsebenzini
KUTHIWA uhlangane nembibizane esajabulela ukubuyiselwa emsebenzini umsakazi wokhozi FM, ungizwenkosi Mchunu, ngemuva kokuxoshwa kwakhe.
ILANGA Langesonto lihabule emthonjeni walo ongaphakathi ukuthi injabulo isheshe yashabalala kulo msakazi, obekumele aqale emsebenzini ngomhla ka-5 kwephezulu kodwa wagcina engaqalanga ngenxa yokuthi uthe efika nje wagixabezwa ngencwadi emmisayo, kwadingeka ukuba abuyele emuva ayohlala ekhaya.
Umthombo waleli phephandaba uveze ukuthi incwadi emmisayo ihambisana nokuphenywa kwakhe ngamanye amacala ahlukene okuthiwa athinta ukuziphatha kwakhe emsebenzini.
Ngokusho komunye umthombo, kusazothatha isikhathi ukuba lo msakazi azwakale emoyeni, okuyizindaba ezimuncu kubalandeli bakhe abebekhalela ukuba abuyiselwe emoyeni ngemuva kokuxoshwa kwakhe ngokwedlule.
Ethintwa YILANGA Langesonto ummeli kangizwe, umnu Vusi Tembe, ukuphikile ukuthi kunencwadi abayitholile yokumisa lo msakazi.
Uthe abayazi leyo ncwadi, bona abakulindele manje wukuzwa ukuthi ungizwe uzongena nini emoyeni.
Okhulumela ISABC, unkz Neo Momodu, akawuphendulanga umbuzo mayelana nale mibiko yokumiswa kwalo msakazi ngemuva kokubuyiselwa kwakhe emsebenzini.
Kunalokhu uphendule ngokuthi ubuyiselwe emsebenzini.
ILANGA Langesonto liphinde lathumela omunye umbuzo linxusa unkz Momodu ukuba aphawule ngqo ngendaba yokumiswa kukaNgizwe kodwa empendulweni yakhe yesibili, unkz Momodu uphinde washo okufanayo, wathi lo msakazi usebuyiselwe emsebenzini kodwa akakazukungena emoyeni njengoba kusenezingxoxo zangaphakathi naye.
Engakaxoshwa ungizwe ubesakaza uhlelo isigqi Sezwe oluba ngomsombuluko kuya ngolwesithathu, ngehora lesibili kuya kwelesine ekuseni.
Kunemibiko engaqinisekiswanga, ethi lo msakazi wakhonjwa indlela kulo msakazo ngenxa yokuthi nguyena obepotshoza izindaba eziyimfihlo zangaphakathi okhozini FM.
lucky.cain@ilanganews.co.za