IMAJUBA IHAMBA YODWA NGEMIPHUMELA

SIGUQISE kwasani ngemiphumela emihle isifunda imajuba njengoba izikole ezingaphansi kwaso kuyizona eziphase kahle zihlula zonke izifunda Kwazulu-natal.

Kulo nyaka ligaye ngomunye umhlathi kulesi sifundazwe njengoba singekho isifunda esithole ngaphansi kuka-70%, zonke zikhuphule izinga. Imajuba ithole u-81.7% yashayelwa ihlombe ngolwesihlanu emcimbini obuse-icc ethekwini, lapho bekuhlonishwa khona abafundi abenze kahle.

Umnu Mthandeni Dlungwana uthe ukusebenza kanzima kwezifunda kumnikeze ithemba lokuthi ngonyaka ozayo kuzobe kukhulunywa izindaba ezinhle kakhulu zokuthi asikho isifunda esishona phansi, kunalokho zizoqhubeka zikhuphuke kakhulu.

Uthi ukuphasa kwezikole kulele ekutheni abaqondisi bezifunda bazinikele kangakanani ekulawuleni izikole ukuze kusetshenzwe. Uthi yingakho ehlala kubona emagxalabeni ngoba kumele baqondise okonakele.

Ilembe lithole u-71.1%, Harry Gwala 71.9%, Mzinyathi 73.1%, Zululand 73.8%, King Cetshwayo 73.9%, uthukela 76.1%, umlazi 76.76%, Pinetown 77.4%, Mgungundlovu 77.5%, Mkhanyakude 78.1%, Ugu 79.6%.

Umqondisi wesifunda Amajuba, umnu Sipho Kubheka, uthi inhlonipho nokubambisana kothisha nabahloli yikhona okwenze lesi sifunda siqengqeleze phambili.

Uthi ngesikhathi beqala ukusebenza bebezibekele ukuthi bafuna ukuthatha iphesenti labo balifanise nelesifundazwe sasegauteng.

“Ubunye yibona obulalulekile. Uma sithola ukuthi esikoleni esithile kunenkingana, siyaphuthuma siyilungise kungaze kungenelele nakwezinye izikole kanti nokubeka eqhulwini isikhathi sokufundisa yikhona engikugcizelelayo kubahloli. Ngibonga ukubambisana okuhle kothisha bethu okuyikhona okwenze safika kuleli zinga,” kusho umnu Kubheka.

Mthobisis@ilanganews.co.za