BAYADINGA UKWESEKWA ABANGAPHUMELELANGA KU-MATRIC
KAKUSIYONA yonke imindeni lapho kuvunguza khona umoya wenjabulo njengoba kusanda kukhishwa imiphumela kamatikuletsheni yango-2018.
Kwabanye abafundi kunomuzwa wokwehluleka nokufiphala kwethemba lekusasa eliqhakazile. Kungalesi sikhathi futhi lapho abanye baze bathathe izinqumo ezinzima njengokuzibulala ngenxa yengcindezi nokungatholi ukwesekwa okwanele, ikakhulukazi emindenini.
Unkz Nozibusiso Nyawose, ongumeluleki wezengqondo ( clinical psychologist) ( osesithombeni), uthi uba mkhulu umthamo wabafundi ababavakashelayo ngalesi sikhathi sokuphuma kwemiphumela, abasuke befuna ukwelulekwa nokuthola umkhombandlela.
Uthe iphutha elikhulu kwesinye isikhathi liba kubazali abaqhathanisa abantwana babo nabanye noma bababeke izici ezibenza bephelelwe wukuzethemba.
“Akukho ukwesekwa okwedlula okwasekhaya ngoba noma ngabe ingcindezi ngaphandle ingakanani kodwa uma wesekwe ekhaya nomfundi angaba nomdlandla wokunqoba, abone kubalulekile ukuba athathe isinqumo sokuqala kabusha impilo.
“Ngiyanxusa ukuba abazali basondelane kakhulu nabantwana babo ukuze bazosheshe bazibone nezimpawu ezithile njengezokuzibulala, ukuze zigwemeke. Uma kukhona emndenini okhombisa izimpawu zokushintsha, kumele kutholwe usizo lokwelulekwa ngokwengqondo, olutholakala mahhala emitholampilo kahulumeni,” kusho yena.
U-adeshini Naicker wechildline EKZN, naye uwafakazele la mazwi, wathi umfundi usuke esenalo ithuba lokucela ukuba kubuyekezwe ukumakwa kwamaphepha akhe, ukubhala i- supplementary exam noma ukubuyela esikoleni ngokugcwele.
“Uma umfundi edinga ukwelulekwa, izingcingo zethu zihlale zisebenza ubusuku nemini. Bangasishayela kwethi: 0800 055 555 ukuze bezothola usizo kubeluleki abaqeqeshiwe,” kusho yena.
Kulabo bafundi abafisa ukuphinda izivivinyo zabo ngojune, sekuqalile ukubhalisa kuze kube umhla ka 31 kwephezulu. Imininingwane egcwele bangayithola kwi- website ethi: www.education. gov.za
ayandab@ilanganews.co.za