NGAPHANDLE KWENKUNDLA
UHAMBA ezinyathelweni zomfowabo omdala usamkelo “Mntanami” Mbambo ovimbela ifree State Stars edlala kwi-absa Premiership.
Usamkelo uqale ibhola elandela umfowabo, umhlonishwa Roger Mbambo, odlale kwidurban Stars nakumthatha Bush Bucks ngokwahlukana, okungamakilabhu asafadalala ebholeni elikhokhelayo.
Uroger udlale kwibush Bucks iholwa ngusturu Pasiya. Ikhono likasamkelo ozalwe mhla ka-20 kumbasa (April) ngo-1990, liqale ukuvelela eneminyaka engu-14 ubudala.
Ubesadlala imiqhudelwano yezimbuzi. Kuthe ngo-2008 wajoyina inathi Lions FC ebiphethwe ngu
Nathi “Mashimane” Maphumulo nayo eseyashabalala.
Ngenxa yekhono lakhe kulo mdlalo udonse amehlo abaqeqeshi bethanda Royal Zulu okuthe uma idayiswa wayozama inhlanhla kwiLamontville Golden Arrows.
Kuthe uma kuhamba isikhathi ingacacisi ngokumsayinisa walibangisa kwiFree State Stars kamike Mokoena ngo2017.
Lo mdlali oke waba sezintini zereal Kings kabongani Ngidi, uzalelwe kwankonka, efolwe- ni, eningizimu yetheku kanti manje umndeni wakhe usuzinze enewlands. Bangu-5 kubo. Omdala nguslindile kube nguMhlonishwa, usizwe, uzamageza bese kugcina yena. Abazali bakhe nguzanele nophila Mbambo kanti bobabili basaphila. Uqale imfundo yamabanga aphansi ebarracuda Primary School, enewlands, waphothola ugrade 12 ehillview High School ngo-2008.
Ngemuva kokuqeda umatikuletsheni akaqhubekanga nezifundo zakhe kwazise ubevele esengene esikhungweni sokuthuthukisa ibhola sikamike Makaab asuke kusona esejoyina inathi. Ingxoxo kambambo NELANGA Langesonto ngempilo yakhe yangaphandle kwenkundla ihambe kanje:-
ILANGA Langesonto ( I/ L): Ukhulele ekhaya elinjani?
Mbambo: Ngikhulele ekhaya elithokomele futhi elinomthetho. Inhlonipho yinto engikhuliswe ngayo ekhaya nokwazisa abanye abantu.
I/ L: Ungumuntu onjani?
Mbambo: Ngingumuntu ozithobile, onomoya ophansi futhi obazisayo abanye abantu.
I/ L: Uyakholwa?
Mbambo: Yebo. Ubaba ungumfundisi wasepostoli kodwa ekhaya siyazenza izinto zesintu.
I/ L: Usushadelwe?
Mbambo: Kangikashadelwa kodwa nginaye umuntu engihlekisana naye. Nginezingane ezimbili uliyana (1) nobontle (6).
I/ L: Ngaphandle kwebhola lezinyawo, ukhona omunye umdlalo owuthandayo?
Mbambo: Miningi imidlalo engiyithandayo kubalwa ithenisi, ibhola lombhoxo kanti nonobhutshuzwayo wabesifazane ngiyawulandela. Ingichazile ibanyana Banyana ngendlela edlale ngayo ingena kwififa Women’s World Cup ezokuba nonyaka efrance.
I/ L: Ushibilika nganhloboni yemoto?
Mbambo: Ngihamba ngepolo GTI.
I/ L: Iyiphi ikilabhu yebhola okhule uyilandela?
Mbambo: Ngikhule ngingumlandeli we-orlando Pirates kanti manje sengithanda ikilabhu yami, ifree State Stars. Phesheya kwezilwandle ngingumlandeli wemanchester City.
I/ L: Ngubani umdlali obukela kuyena?
Mbambo: Ngithanda ulebron James ongumdlali webasketball wase-united States of America (USA). Ngithanda indlela asiza ngayo abantu abantulayo emhlabeni.
I/ L: Yisiphi isilwane osithandayo?
Mbambo: Ngithanda indlovu kanti ngiyesaba ukufa inyoka.
I/ L: Usichitha kanjani isikhathi sakho?
Mbambo: Ibethlehem yindawo engenabo ubukhazikhazi obuningi. Ngizihlalela endlini nolinda Bhengu ngizibukele umabonakude noma ngiye enxanxatheleni yezitolo.
I/ L: Emidlalweni ewuchungechunge yakuleli yimuphi owuthandayo?
Mbambo: Ngithanda uzalo ngoba olwasekhaya. Umlingisi engizifela ngaye ngusbu odlalwa ngusimphiwe Majozi.
I/ L: Yimuphi umculo okusha- ya ngaphakathi?
Mbambo: Kuya ngokuthi ngikumuphi umuzwa. Ngiyayilalela i- hip hop ne- house. Umculi engimthandayo ngusjava.
I/ L: Yini eyokuqala oyenzayo uma uvuka ekuseni?
Mbambo: Ngiyathandaza bese ngibheka imiyalezo kumakhalekhukhwini wami.
I/ L: Ukhona ezinkundleni zokuxhumana?
Mbambo: Yebo, ngikhona kwifacebook. Ngingusamkelo China Mbambo kanti kwi-instagram ngingu-sam_mbambo. Ngiphatha i-iphone 8.
I/ L: Uthanda hlobo luni lokudla?
Mbambo: Ngiyazifela ngojeqe nobhontshisi.
I/ L: Yiliphi izwe ofisa ukulivakashela?
Mbambo: Ngilangazelela ukuya ethailand
I/ L: Ukhonze umbala onjani?
Mbambo: Ngithanda oluhlaza okwesibhakabhaka.
I/ L: Usebenzisa hlobo luni lwesiqholo?
Mbambo: Ngizizwa kahle uma ngizifuthe ngeziqholo zakwa-azzaro.
I/ L: Uzibona ulaphi eminyakeni eyisihlanu kusuka manje?
Mbambo: Ngizibona ngisaqhubeka nokudlala ibhola, ngenyuse nezinga lami.
I/ L: Uma ungaba ngumengameli wezwe yini ongayenzela isizwe?
Mbambo: Ngingaqinisekisa ukuthi bonke abantu bajabulile. Ngingavula indawo lapho kuzolalelwa khona izinkinga zabo bese ngiba nethimba elizobaphendula.