ESKHALENI:
KUBUKEKA sezibaliwe izinsuku zikajoel Masutha oyibamba lomqeqeshi kwichippa United. Umasutha uwuvule kabi lo nyaka omusha ka-2019 eshayelwa ekhaya yibloemfontein Celtic ngo-1-0 wegoli likandumiso Mabena emdlalweni we-absa Premiership obungolwesihlanu esisa Dukashe Stadium.
Unyaka odlule usongwe kabi kwabanye abalolongi, kubalwa uclinton Larsen obelolonga ilamontville Golden Arrows emxoshe maqede yaqasha usteve “Mphathi” Komphela kanti nemaritzburg United ifake umgxala ufadlu Davids yaqasha umuhsin Ertugral osizwa ngumabhudi Khenyeza.
Phela ziqinile izinsolo zokuthi abaphathi bechippa, abaholwa ngusiviwe “Chippa” Mpengesi, bahlongoza ukumchitha umasutha njengoba ehluleka wukwenza into abeyilandelwe.
Ichippa bekubhekwe ukuba iwunqobe lo mdlalo njengoba iceltic ihaqwe yizinkinga zemali. Iceltic iye kulo mdlalo ingenamqeqeshi emuva kokuba ukomphela esulile wajoyina i-arrows.
Selokhu eqashiwe umasutha kwichippa akakanqobi mdlalo.
Yingalesi sizathu-ke kuthiwa umpengesi useqalile uthungatha omunye futhi umqeqeshi.
Uma kuwukuthi umasutha ugcina ngokuxoshwa, kuzokube sekungumqeqeshi wesithathu ukuchithwa ngumpengesi.
Ichippa iqale isizini ngodan “Dance” Malesela, yamxosha. Iqashe u-eric Tinkler naye yamfaka amasondo njengoba isilande umasutha naye oselengelwa yizembe.
Umasutha uqashwe yichippa nje, ubevele exoshwe yiblack Leopards okusho ukuthi uma engaxoshwa kwichippa uzobe esexoshwe kabili ngesizini eyodwa.
Nalo mqeqeshi uyazazela ukuthi umsebenzi wakhe usengcupheni njengoba ichippa ingenzi kahle.
Umasutha uzikhalela ngokuthi wenza konke ejimini bese abadlali behluleka ukubhakuzisa ibhola enethini okumhlinzela ezibini.
Ekhuluma naleli phephandaba umasutha, uthe: “Ibhola linjalo-ke. Okubuhlungu nje wukuthi manje umsebenzi wami usengcupheni ngoba sahlulelwa ngemiphumela.
"Engingakusho nje wukuthi ngilindele noma yini kusuka manje.”
Njengoba kuthiwa ukuwa kwendlu kusho ukuvuka kwenye, kube njalo ngokunqoba kweceltic njengoba kwehle kahle kulehlo- honolo Seema obambe izintambo zokuqeqesha okwesikhashana.
Umasutha akayedwa enkingeni njengoba nabaqeqeshi abasha beteam of Choice, u-ertugral nokhenyeza, beziphonse emlilweni ovutha ubuhanguhangu okumele behlise amalangabi awo ngokukhulu ukushesha kungenjalo uzobagojela nabo njengoba le kilabhu ibambe ibhuleki kwi- log yeAbsa Premiership.
Laba baqeqeshi bazoqala umsebenzi wabo ngomdlalo onzima neArrows namuhla ngesonto ngo15h30 esugar Ray Xulu Stadium, eclermont.