Igqemeke udume i-chiefs
Igqemeke udume ilinyalelwa yizilomo
USIZI luzwa olunye ekhempini yekaizer Chiefs njengoba isigqemeke enye ingozi ilinyalelwa ngomunye umdlali omqoka ongase ahlale isikhathi eside engadlali.
Ichiefs iguqiswe yimamelodi Sundowns ngo-2-1 kowe-absa Premiership izolo ngomgqibelo ntambama EFNB Stadium, esoweto. Amagoli okunqobe ngawo idowns abekwe enethini nguAnthony Laffor ngomzuzu ka-3, elinye lashaywa ngulebohang Maboe ngoka-82. Elechiefs lishaywe nguwillard “Salt & Vinegar” Katsande ngomzuzu ka-14.
Lo mdlalo uphele sekumuncu kwichiefs ukatsande ekhishwa ngohlaka emuva kokudonseka umsipha ethangeni lwangakwesokunxele.
Odokotela bechiefs bazamile ukumubhandisha, bamunika namaphilisi ezinhlungu kodwa kwazifanela nje, kwaphoqeleka ukuba akhishwe ngomzuzu ka-70. Indawo yakhe ithathwe ngukabelo Mahlasela.
Kuvela ukuthi lo mdlali kungenzeka ahlale amasonto ambalwa engadlali ngenxa yokuthi udonseke imisipha emqoka. Kuvela ukuthi yingoba imilenze yakhe isithwale imidlalo eminingi ingaphunyuzwa.
Kuthiwa into engase yenziwe yichiefs wukuthi idlalise lo mdlali ejovile kwazise iyamdinga njengoba kuqale umzuliswano wesibili.
Kulimala ukatsande nje, kusanda kuvela izindaba zokuthi u-itumeleng Khune ongunozinti weChiefs usekude ukubonakala njengoba elimele ihlombe.
Nokho isikhala sakhe sihlale obala njengoba ichiefs ihlulwe ngenxa kavirgil Vries ongene endaweni yakhe. Lo nozinti weqiwe yibhola obekufanele alibambe kalula, lavele lawela kumaboe ongazange ananaze walibeka enethini. Ukhune obehleli ezihlweleni, ubonakale enikina ikhanda kucaca ukuthi akajabulile.
Nokho lo mdlalo kawuzange ufike kuleli zinga ebelibhekiwe, bekubonakala ukuthi abadlali babuya emaholidini, bengahlaselani.
Okugqamile wukuthi la makilabhu abesabana njengoba abevalile emuva. Onozinti kayikho imi- nyakazo etheni abayivimbile ngaphandle nje kokulilanda enethini.
Lona bekungumdlalo wokuqala ka-ernst Middendorp ukuhlulwa kuwona selokhu ejoyine ichiefs ngenyanga edlule.