Liyabonakala iqhaza likajohnny Clegg
Waboshwa okokuqala eneminyaka engu-15 ngokuzihlanganisa nabantu abamnyama
U JONATHAN ‘Johnny’ Clegg ungomhlophe ongadingi kwethulwa ngisho nasemphakathini wabomdabu ngenxa yohlobo lwempilo eyehlukile nemlethele udumo oluhle kubantu bazo zonke izinhlanga ezakhele leli likamthaniya. Yinsizwa lena ezakhele igama ngendima yayo kwezomculo womdabu ngesikhathi yona nomhlobo wayo, usipho Mchunu, bedlalela ijuluka ngeminyaka yawo 1980.
Ukusibamba kahle kwakhe isitayela somculo womdabu nokusina njengezinsizwa zomdabu kungasileli lutho kwaze kwenza abanye bakubo bametha elithi Le Zoulou Blanc, okusho ukuthi ‘uzulu Omhlophe’ ngolimi lwesifulentshi. Kanti izinsizwa zamazulu zimhasha zithi “Skeyi jikel’eshobeni” lapho-ke ngeke usamthinta.
Ukuba lidliwa okuye kubonakale kwabamhlophe uma bethi bazama ukulingisa abomdabu, ngeke ukubone lapha kujonathan. Ngenxa yokuba kungeke kwaba nobulungiswa ukukhuluma ngojonathan Clegg yedwa ashiywe usipho Mchunu, izokwenziwa imizamo yokumthola kulotshwe ngaye ngokuzayo, kulona leli likamafukuzela.
UKUZALWA KWAKHE
Ujonathan Clegg, manje osewahlonishwa nayindlunkulu yobukhosi bamangisi ngokuthi OBE (Order of British Empire), uyisakhamuzi sakuleli esazalelwa ebritain mhla ka-7 Juni 1953 ebacup, Lancashire. Uyise uyingisi kanti unina wabe eyisakhamuzi sasezimbabwe, ngesikhathi lelo zwe lisabizwa ngerhodesia.
Umndeni kanina kajonathan ungowesizwe samajuda esiphuma kwelasepoland. Ukhuliswe ngamasiko abajuda, wafunda ngemiyalelo elishumi kodwa wakwenqaba ukugcina i- bar mitzvah okuyisiko lamajuda elenzelwa abafana asebehlanganise iminyaka eyi-13, futhi akazange azihlanganise nezingane zamajuda esikoleni.
Abazali bakhe behlukanisa esemncane, kwathi lapho eseneminyaka engu-6 unina weza naye kuleli kanti esemncane wake wahlala isikhathi esingaphansi konyaka kwa-israel.
UKUHLANGANA NAMAZULU
Esengena esigabeni sokuba yibhungu emajalidini asenyakatho yegoli wazithola emdibi nomculo nokusina kwamazulu.
Ucharlie Mzila owabe esebenza ukuhlanza amafulethi emini kuthi ntambama abe ngumhlabeleli, wafundisa ujohnny Clegg ulimi lwesizulu nokudlala isiginci ngendlela kamaskandi nokusina isishameni okwakwenziwa yizinsizwa zamazulu.
Mhlawumbe khona lapha singanezela ngokuthi ujohnny uyakwazi ukudlala inkostini nemfiliji, nakuba kungaveli emlandweni ukuthi yena wakufunda nini, futhi efundiswa ngubani. Kodwa kuyavela ukuthi uzalwa ekhaya lomculo njengoba unina engumdlali wopiyano emkhakheni wejazz.
Ukuzihlanganisa kwakhe nabomdabu kwakumqhatha nemithetho kahulumeni yangaleso sikhathi njengoba izwe lalibuswa ngenqubo yokuhlalisa izizwe ngokwahlukana, ikakhulukazi uma sekushayisiwe emsebenzini. Waboshwa okokuqala eneminyaka engu-15 ngakho ukuzihlanganisa nabantu abamnyama sekudlule isikhathi esasivunyelwe emthethweni, okubizwa nge- curfew hours.
UHLANGANA NOSIPHO MCHUNU
Eseneminyaka engu-17 ujohnny wahlangana nosipho Mchunu, baqala ukudlala ndawonye naye kwaze kwaqambeka iqembu lomculo ijuluka.
Ukuhlangana kwabo kanjalo kwaze kwaboniswa nasohlelweni lwethelevishini olusihloko sithi Beats of the Heart: Rhythm of Resistance. Esakhula ujohnny waba yisitshudeni futhi wafundisa iminyaka emine ewits University nasenatal University. Ngalesi sikhathi wakhiqiza imibhalo eminingi ngomculo wamazulu nokusina. Ngasekuqaleni kohambo lwakhe kwezomculo ujohnny wahlanganisa umculo nokufunda ngezamasiko, okubizwa nge-anthropology khona ewits.
I-JULUKA
Leli qembu laliwuhlobo lobambiswano kwezomculo olwalungavamile ngaleso sikhathi, ukuba omhlophe (uclegg) nowomdabu (umchunu) badlale ndawonye. Ijuluka eyabe inamalungu angu-6, abathathu abamhlophe nabathathu abamnyama, yayisibhekene nenselelo yokuhlushwa nguhulumeni nengcuphe yokuba ivalwe ngesikhathi ikhipha umsebenzi wayo wokuqala osihloko sithi: Universal Men ngo-1979.
Baqala badlala ezindaweni zangasese njengasemanyuvesi, emasontweni, emahostela nasemizini yabantu imbala ukuze baziwe ngabantu kwazise imisakazo emikhulu yayingeke iwudlale emoyeni umculo wabo.
Okunye futhi okungavamile ngomculo wayo wukuthi wawuxube oshuni bezizwe zase
Europe okungama
Irish,
Scottish,
Welsh nezinye, ngegama elilodwa okuthiwa Celtic nesizulu. Izinhlamvu zezingoma zazinomyalezo wepolitiki ofihliwe nakuba yena uclegg esakusho namanje ukuthi kwabe kungeyona inhloso ekuqaleni ukuba ijuluka ibe yiqembu lomculo wezepolitiki. Usho nokuthi yipolitiki eyalandela bona. Uthi kuyena ukuba yisishoshovu sezombusazwe kusho ukuzinikela kwimfundiso ethile yezombusazwe.
“Angilona ilungu lanoma yiliphi iqembu lepolitiki. Ngimele amalungelo abantu” kusho yena. Imiyalezo yepolitiki ezingomeni zeJuluka nokuxuba kwayo izinhlanga ezahlukene kwayidalela amazinyo abushelelezi kuhulumeni ngoba uclegg namalungu ayo bebeboshwa namakhonsathi abo ahlakazwe.
Naphezu kokuba kunjalo ijuluka yakwazi ukuhambela amazwe angaphandle idlale koEurope, Canada nase-united States of America. Bathola i- platinum kabili negolide kahlanu ngezingoma zabo, baduma emhlabeni wonke. Ijuluka yahlakazeka lapho usipho esebuyela ekhaya ukubheka umndeni wakhe.
I-SAVUKA
Yena nomculi womdabu ududu Zulu babumba iqembu elisha elixube izinhlanga abaletha ngelithi yi-savuka. Umsebenzi walo osihloko sithi Third World Child washisa izikhotha emazweni ase-europe, okubalwa phakathi kwawo nelasefrance imbala. Isavuka yaqopha neminye imisebenzi njengalowo osihloko sithi Dust and Dreams, nosihloko sithi Heat, eyaqokelwa umklomelo we-grammy.
Ujohnny nesavuka badlala kuleli nasemazweni angaphandle nakuba ukwenqaba kwakhe ukuba angadlali kuleli zwe ngesikhathi sobandlululo kwamdalela isimo esishubile emibuthweni eyayilwa nobandlululo nokwaphetha ngokuba axoshwe yinyunyana yabaculi ibritish Musicians Union.
Kwake kwenzeka isavuka yaheha izihlwele zezibukeli elyon kwelasefrance kangangokuba umichael Jackson waphoqeka ukuhoxisa elakhe ikhonsathi ekhala ngokuthi uclegg neqembu lakhe bantshontshe abalandeli bakhe! Ngo-1993 isavuka yahlakazeka emuva kokushona kukadudu Zulu owadutshulwa ethi uzama ukulamula impi yamatekisi.
UKUBUYELANA KWEJULUKA NOKUDLALA YEDWA
Maphakati neshuminyaka lawo-1990 ujohnny nosipho bahlanganisa ijuluka futhi baqopha i- album entsha futhi bazungeza amazwe ngamazwe bedlala no King Ade ngo-1996.
Kusukela ngaleso sikhathi ujohnny Clegg useqophe amaalbum yedwa amaningana futhi eqhubeka nokuhambela amazwe angaphandle. Kwelinye kulawo makhonsathi akhe wajoyinwa nguMnu Nelson Mandela owadansa lapho sebeshaya ingoma yokukhononda esihloko sithi: “Asimbonanga”. Ngesikhathi esebuthaka umandela kuthiwa i- video yale ngoma yayinewozawoza emazweni angaphandle kwaseningizimu Afrika.
IMPUMELELO YEZINGOMA ZAKHE
Ingoma yakhe esihloko sithi “Scatterlings of Africa” yangena ohlwini lwezingoma ezi-shisa izikhotha I-UK Singles Chart lapho ya-yingunombolo 44 ngofebhuwari 1983 nejuluka, yaba ngunombolo 75 ngomay 1987 nesavuka. Ngonyaka olandelayo yaba yimvunge ekhala emdlalweni webhayisikobho irain Man eyahlabana nge-oscar ngonyaka ngo-1988. Ingoma esihloko sithi “Life is a Magic Thing” yasetshenziswa nje-ngemvunge yomdlalo webhayisikobho osihloko sithi “Ferngully” kanti ingoma yesavuka esihloko sithi “Dela” nayo yasetshenziswa yaba yimvunge emdalweni wefilimu elisihloko sithi George of the Jungle ngo-1997 nelalandela lisuselwa kuleli ngo-2003.
Lena esihloko sithi “Great Heart” yasetshenziswa emdlalweni wefilimu elisihloko sithi “Jock of the Bushveld”. Kwathi esihloko sithi “Cruel, Crazy Beautiful World” yaba yingxenye yefilimu elisihloko sithi “Opportunity Knocks” ngo-1990 nakwelisihloko sithi Career Opportunities ngo-1991.
Lena esihloko sithi “Great Heart” yasetshenziswa futhi yaba yimvunge ezwakala uma sekuvela uhlu lwamagama abebebambe iqhaza ekwenziweni kwefilimu yakwa Disney eyinganekwane ngo-2000 esihloko sithi “An Elephant’s Tale”.
Ngo-2002 uclegg wabamba iqhaza ngezingoma eziningana ezidamane zizwakala lapha nalaphaya ekuqoshweni kwe-dvd kaJane Goodall elithi “Wild Chimpanzees” lapho evela kancane ujohnny Clegg ese-studio. Ujimmy Buffett waqopha ingoma kaclegg ethi “Great Heart” ngesikhathi eqopha i- album yakhe (ubuffett) ethi Hot Water.
Ujohnny ulobe ngokubambisana nolebo M ingoma yabo esihloko sithi Diggah Tunnah beyiqambela umfanekiso wezilwane wakwaDisney ngo-2004 wodumo ilion King.
WENZANI MANJE?
Ngaphandle kokuba yiciko kwezomculo nokuba yisifundiswa ngezamasiko nemikhuba yabantu, ujohnny Clegg ungumnumzane onomndeni. Ukhamba lufuze imbiza kujesse Clegg oyindodana kajonathan njengoba naye ekuyo le ndima yezomculo. Umsebenzi wakhe wokuqala oqoshwe ngo-2008 osihloko sithi ‘When I Wake Up’ ukhombisa ukuthi ujesse udlala uhlobo olwehlukile lomculo kulowo odlalwa nguyise.
Nokho naye usezakhele udumo njengoba umsebenzi wakhe ubuqokiwe emikhakheni emibili ye-south African Music Awards. Ezibuhlungu zithi ngo-2015 ujohnny Clegg kuvele ukuthi usengenwe yisifo somdlavuza wobende.
Akwenzayo njengendlela yokuvalelisa kubalandeli bakhe wukuba nochungechunge lwamakhonsathi ajikeleza emazweni ahlukene. Okunye futhi kube wukuqopha iculo ngokuhlanganyela namaciko akuleli amaningi ngendlela ethi mayifane naleyo eyake yenziwa ngabaculi base-united States of America ababeholwa ngulionel Richie nomichael Jackson ngeculo elisihloko sithi ‘We Are The World’.
Kuleyo ngoma esihloko sithi “Crossing Over” kunabaculi abavelele bakuleli abangaphezulu kuka-50 abahloniphe ujohnny Clegg ngokubamba iqhaza kuyona. Phakati kwabo kubalwa abadlali besiginci uvusi Mahlasela nodavid Kramer, uzolani Mahola ongumculi wodumo lwefreshly Ground nabanye.