INDIDA NGOGU FESTIVAL
SEKUPHINDE kwaqubuka isidididi ngomcimbi waminyaka yonke, Ugu Jazz Festival, owenzelwa eport Shepstone.
Njengamanje kunezikhangiso ezimbili ezehlukene ezisakazwe ezinkundleni zokuxhumana ezifakwe yizinkampani ezahlukene, ezimemezela ngalo mcimbi. Kuzo zombili lezi zikhangiso, kuvela ukuthi le micimbi izoba ngosuku olulodwa endaweni eyodwa.
Ekuqaleni kwesonto ekhasini lenkundla yokuxhumana laseyadini Lounge, kajabulani Zama, okuyilona eliqokwe ngumasipala wesifunda Ugu ukuba lenze ugu Jazz Festival, kufakwe isikhangiso esinemininingwane yomcimbi, esicacisa ngosuku lomcimbi okuwumhla ka-29 kunhlangulana (June) nendawo ozobe wenzelwe kuyo ebizwa ngokuthi Ugu Sports and Leisure.
Izolo ngomgqibelo emini abesya Sound, okuyinkampani kasya Msomi ebihlela lo mcimbi eminyakeni edlule, bafake enkundleni yokuxhumana esabo isikhangiso somcimbi obizwa ngokuthi Ugu Jazz Arts Festival ozokwenziwa ngosuku olufanayo futhi endaweni eyodwa.
Ngonyaka owedlule lo masipala umemezele ngokusemthethweni ukuthi inkampani esizokwenza lo mcimbi ngekajabulani Zama, isiyaphuma isya Sound kasya Msomi. Ngawo unyaka owedlule, usya wenze owakhe umcimbi obungahlangene nomasipala obizwa ngokuthi Ugu Jazz Arts Festival.
Ethintwa YILANGA Langesonto usya Msomi ngalesi sidididi esiqubulwe yilezi zikhangiso, uthe: Lesi sikhangiso sasenza ngonyaka owedlule uma siqeda nje ukwenza lo mcimbi wethu wokuqala. Lokho sasikwenza ngoba sinezinhlelo zokuqhubeka nokuwenza.
Umsomi akakwazanga ukuphendula kweminye imibuzo, wathi usazoxhumana nethimba asebenza nalo ukuze bezobonisana ukuthi kwenziwa njani uma kunjena.
Ebuzwa ukuthi le nkundla ubeseyiqashile yini njengoba sebenze lesi sikhangiso, akakwazanga ukuphendula, wama kwelokuthi usazoxhumana nethimba asebenza nalo.
Ujabulani Zama akathandanga ukuphawula, wayalela intatheli ukuba ikhulume nomasipala.
“Ngiqashwe wumasipala ukuba ngenze lo mcimbi, akusiwona owami, kungcono uthinte wona ngoba nami ngizwa ngabo yonke into okumele ngiyenze,” kusho uzama.
Ufrance Zama, okhulumela umasipala, uthe bona abazi lutho nje ngomcimbi kasya, abawaziyo yilona owabo. “Ngeke ngiphawule ngalona omunye umcimbi ongitshela ngawo, kodwa engingakhuluma ngawo yilona umasipala oqoke iyadi ukuba liwenze. Kuyimanje amalungiselelo awo ayaqhubeka,” kusho ufrance. makhoba@ilanganews.co.za