Imisakazo yomphakathi iyinkundla yoqeqesho
SIBUYE sisize isikhathi samaholide esifana nesiphuma kuwona ngoba kuba nesikhathi esiningi osichitha emgwaqweni uvakashela izindawo ezahlukahlukene. Lokho kuvakasha kukusondeza nemisakazo ongakwazi ukuyizwa lapho uzinze khona. Umfundi wale ngosi usakuqaphela kudala ukuthi ngiyikhonzile, ngiyayilandela imisakazo yomphakathi. Inkinga ngayo wukuthi isakazela iziyingi ezincane njengoba kumele igxile kulowo mphakathi ngezinhlelo ezenzayo ngokwe- coverage.
Kungalesi sizathu nasedolobheni elikhulu njengetheku, uzofica sekunenqwaba yalolu hlobo lweziteshi ngoba kumele zenze okuhlukene.
Isibonelo nje, enyakatho yetheku uzofica inanda FM ezinze enanda, nevibe FM ezinze Kwamashu, kuthi phakathi edolobheni ufice Izwi Lomzansi nedurban Youth Radio, eningizimu ufice intokozo FM njalo njalo.
Qaphela, zikhona futhi nezinye kuzo lezi zindawo, kodwa sibalula lezi ukwenza isibonelo.
Nakuba uzokwazi ukuzizwa zonke uma umaphakathi netheku kodwa kufanele engabe zenza izinhlelo ezahlukene, kuye ngokuthi zavumelana ngani nabalawula amagagasi omoya, okuyi-icasa.
Kuba yishwa-ke ukuba ugcine ungasezwakali umehluko ezinhlelweni uma ulalele, sebehluleka wukuveza lokhu abathembisa ukuthi bazohluka ngakho kwezinye iziteshi abazifice zivele zikhona.
Phela ama- community radio station singawafanisa nezikhungo zokuqeqesha njengoba abaningi abaqala kuwo begcina sebesakazela lena emikhulu.
Khumbula phela ukuthi nakuba zikhona izifundo okwazi ukuzenza ezikhungweni ezahlukene ezikwenza uqonde kangcono imboni yezokusakaza, kodwa uqeqesho olutholakala kule misakazo lucija kakhulu ithalente.
Yingakho kukhona abasakazi abaphumelele namuhla kodwa abangakaze nhlobo balubhade ezikhungweni ezizimele zemfundo ephakeme.
Lolu hlobo lwemisakazo luyakucija, lukulolonge emazingeni ahlukene.
Abanye bafika bengakaze babone nokuthi i- studio sokusakaza yinto enjani, beziphushelwa wuthando, kodwa baphume sebengochwepheshe.
Ake uqalaze nje eziteshini ezinkulu ozilalelayo ukuthi bangaki abaqhamuke eziteshini zomphakathi nasebengabasakazi abahlonishwayo namuhla.
Ekugudleni kwami ngamaholide, ngize ngakwazi nokulalela iradio Khwezi, ICORA FM, Nguna FM nezinye nje, ebengibona ngoba sekubhala kwisidlala msindo ebengingakaze ngizilalele ezizwakala le enyakatho yekwaZulu-natal.
Yikho kanye lokhu obekungenza ngikhale ngesinqumo sabaphathi sokuvumela nabasakazi baye emaholidini ngalesi sikhathi sonyaka esikhundleni sokubasebenzisa ukumaketha izinhlelo esingakwazi ukubalalela kuzo unyaka wonke ngoba basuke sebezijwayele, sebeshibilika.
Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzona umbhali.
Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za