Hlela imithwalo yakho uma uyoqala enyuvesi
KUSUKELA ngesonto eledlule isiphithiphithi sokubhalisa emanyuvesi siqalile. Kungekudala kuzongenwa emagunjini okufundela kushe umsebenzi. Baningi abafundi abasha abayoqala ukufunda ezikhungweni zemfundo ephakeme.
Kulabo-ke abayongena okokuqala kulezi zikhungo kuningi okushintshayo kwazise basuke sebengena kwesinye isigaba sempilo lapho kusuke sekufanele bafunde nokuzimela. Iningi labafundi lishiya emakhaya liyohlala ezindaweni ezihlala izitshudeni kanti uma uzohlala ngaphandle kwasekhaya, usalelwe ngamasonto ambalwa ukuba uqoqe konke ozokudinga.
Okubalulekile kunakho konke wukuthi ungathuthi yonke into ekhaya, izindawo ezihlala abafundi zivamise ukuba ngamagumbi amancane. Ngaphambi kokuba uhambe ekhaya, bheka kuqala ukuthi yini ozoyifica lapho uyohlala khona.
Kwesinye isikhathi usuke uzodinga izinto ezifana nomgqomo, idesk lamp nokunye okumbalwa. Kwesinye isikhathi kukhona izinto u- flatmate wakho asuke ezozithenga naye eningazisebenzisa ndawonye. Ungasheshi uthenge izinto ezinjengeketela, itoaster nezinto zokuhlanza endlini.
Linda uze ufike endlini bese nihlukaniselana izinto enizozithenga. Okwamanje nazi izinto okumele uzipakishe:
Uzodinga i- duvet, amashidi amabili noma awu-3 nama- pillow case. Kungakuhle kube usayizi wedouble bed noma ngabe uyolala kwi- single bed. Kwesinye isikhathi izindawo ezihlala abafundi abenza unyaka wesibili noma wesithathu ziba nama- double bed.
Ukuba nama- pillow no- blanket kuzokwenza igumbi lakho kube sengathi usekhaya kanti futhi izindawo zokuhlala zasemanyuvesi zijwayele ukubanda.
Kubalulekile ukuba kubekhona i- mattress protector ngoba kawazi ukuthi ngubani obesebenzisa umbhede ngaphambi kwakho, noma ube ne- mattress topper ngoba imibhede kayivamile ukuthofozela.
Gcina umnyango uvuliwe - leyo yindlela elula yokwakha ubungani endaweni ohlala kuyo.
Phatha ama- hanger akho.
Yiba nezinto zokuhlanza endlini ngoba ngisho kungaba khona oklinayo ebhilidini kodwa ngeke angene egumbini lakho.
Yiba nama- ear plugs ngenxa yokuthi kuzoba nezikhathi lapho umakhelwane wakho ezoba neparty khona, kube nomsindo.
Uma usuqomile noma uqonyiwe kumele ube nama- condom noma izivimba nzalo (contraceptives).
Imithi: amaphilisi ezinhlungu, imithi yomkhuhlane.
Izinto ozisebenzisa nsukuzonke njenge- shower gel, insipho, i- shampoo, i- conditioner, i- moisturizer ne- toothpaste nezinto zokucwala ikhanda.
I- bath mat I- bath towel nama- hand towel
Isikhwama se- washing esilula sokuphatha yonke into, ngisho kungabe uwashelwa ekhaya.
Izitsha - kungaba amapuleti awu-4 nama- bowls. Qinisekisa ukuthi ziyakwazi ukusebenziseka kwi- microwave. Kudingeka ube nemimese, izipuni, izimfologo - kube wu-4. Kufanele ube naso futhi isipuni sokhuni, isitsha sokucwenga i-rice, i- recipe book nokunye.
Udinga ne-casserole dish yokwenza ipasta bake kwazise ilula ukuyenza. Udinga namabhodwe, ibaking tray, izikhaftini namafreezer bags uma ufuna ukupheka ukudla ozokudla isonto lonke. Zisemqoka futhi izingilazi namamug. Yiba ne- academic diary, nelever- arch files
Okukagesi okudingayo yi- extension cable ngoba kunokwenzeka ungabi nama- plug ekamelweni. Ungakhohlwa ama- charger - eyecellphone, i- laptop noma yini ozobe uyisebenzisa.
Ungakukhohlwa okuyizincwajana ezibalulekile ezifana nomazisi, i- medical aid card, i- confirmation letter ye- bursary noma yescholarship, i- acceptance letter yaseyunivesithi, i- driving licence, i- bank card, ICV nokunye.
I- suitcase elincane noma isikhwama esikhulu ozosisebenzisa uma uvakasha ekhaya noma uvakashela abangani.
Izithombe zokuhlobisa odongeni zinhle kakhulu ekuhlobiseni noma uzibukele uma uzizwa ukhumbule ekhaya.
Amagumbi okuhlala abafundi kawajwayele ukuvuleka kahle, yiba ne- room spray noma i- diffuser.
Umthombo: The Independent