2. ANGIFINYELELI KUVUTHONDABA
NGINENKINGA yokungafinyeleli kuvuthondaba uma senza ucansi. Ngenzenjani?
IMPENDULO: Ngiyayiqonda inkinga yakho futhi ngiyazi ukuthi akumnandi ukungafinyeleli kuvuthondaba. Cishe wonke umuntu uma esenkonzweni yasekamelweni usuke elangazelele ukufinyelela kuvuthondaba, yingakho ngesinye isikhathi kuba nezingxabano phakathi kwezithandani uma omunye ehluleka wukuthokozisa omunye ngendlela emfikisa kuleyo ndawo.
Okwenza ngingakwazi ukukuphendula kahle lapha ukuthi angiqondi noma ungowesifazane noma ungowesilisa. Okwenza ngithinte indaba yobulili wukuthi izinto ezingaholela kuleso simo sakho ngeke zifane. Isibonelo nje - uma ungowesifazane kungenzeka ukuba akuwena onenkinga, kodwa ngumuntu osuke unaye ongakwazi ukukuthokozisa ngendlela yokuba ukitazeke uze ufinyelele kulelo qophelo. Leyo-ke futhi yinkinga yamadoda amaningi, ayehluleka ukushaya ezindaweni ezithile ezenza owesifazane athokoze aze afinyelele kuvuthondaba naye.
Owesilisa ziningi izinto ezingenza engafinyeleli kuvuthondaba. Ukuphazamiseka kwengqondo njengokuba nengcindezi kungaba nawo umthelela kanti futhi nemishanguzo ethile yokwelapha njengamaphilisi engcindezi ( antidepressant), awe- blood pressure angasidala lesi simo kwabanye. Isifo sikashukela naso singayidala le nkinga. Engingakucebisa ngakho ukuthi bonana nodokotela ozocwaninga, ahlole ukuthi ngabe isimo sakho sidalwa yini, abheke nendlela ongasizakala ngayo. Mhlawumbe kungakusiza ukubonana nodokotela wengqondo.