Izidubedube zokuphetha nokuqala unyaka elokishini
MATWETWE (WIZARD) UMQONDISI: Kagiso Lediga ABADLALI ABAPHAMBILI: Sibusiso Khwenana (Lefa), Tebatso Mashishi (Papi), Brendan Sean Murray (Kruger), Masello Motana (Ziphora), Kgomotso Lediga (Gogo kalefa)
UHLOBO: Crime/comedy/adventure/drama IMINYAKA: 16 D/L/S/V UMHLAZIYI: Zowakha Mbatha W
USUKU lokugcina onyakeni kanti njengokujwayelekile ziyaduma nakuleli lokishi i-atteridgeville, uwonkewonke ulungela ukungena onyakeni omusha. Kunabafanyana ababili abangamathe nolimi ulefa ohlala nogogo wakhe nopapi onebala elimhlophe. Ulefa uhlakaniphile kanti wamukelwe nasewits ukuyofunda khona uma kuqala unyaka kanti upapi akazimisele ngokuya esikoleni kulo nyaka oqalwayo.
Bangamaphanta njengoba ulefa enekhono nolwazi ngezitshalo nokuyiyonanto ayiyela ewits njengoba benensavunsavu yensangu abayikhulisa emijondolo ehlukene. Upapi uhlala nonina njengoba uyise obenamatekisi engasekho emhlabeni.
Kwenzeka okuhlasimulisa umzimba ngalolu suku uma ulefa efika kubo kamngani wakhe egcina eholelwa ophathe ngunina kapapi uziphora baze benze ucansi nokuwusuku lwakhe lokuqala ngqa empilweni ekubeni umngani wakhe ulibele egunjini lokugeza eshaya iponyaponya njengoba ezikhonzele isifazane asibiza ngamagama angamukelekile.
Ufunga uyagomela upapi ukuthi namuhla nakanjani uzomthola owesifazane azolala naye njengoba ephoqa umngani wakhe ukuba bathole imali yokuthenga utshwala namakhondomu.
Kulo leli lokishi kuningi okuqhubekayo ngalolu suku, kunanezigebengu ezaziwayo ezibamisa kabi uma benqaba ukuzidayisela insangu yabo ngoba bengavumelani ngemali nenconywa ngokuba namandla.
Bagcina betholana nomlungu ukruger obanika u-r100 000 owukheshi ngesivumelwano sokuthi bazomlethela le nsangu kanti izigebengu zisezithendeni zabo, zigcine zibabamba inkunzi zibephuca le nsangu.
Ubuhlakani bukalefa buyavela futhi uma esefonela ukruger emazisa ngosekubehlele njengoba upapi esentshontshe nesibhamu sakubo ngenhloso yokuyohlasela izigelekeqe ezisephathini manje ebilungiselelwa usuku lonke kuleli lokishi.
Uzozithola uhlala sengathi ucindezela amabhuleki ngasekupheleni kwayo uma kuvela uku- thi ulefa ufuna ukutshela ubhululu wakhe ngokwenziwe ngunina kuye. Ingena ngolwesihlanu oluzayo e-cinema.
NGEZANSI wuhlu lwe-top 10 yangempelasonto edlule yangomhlaka-11-13 January nalapho I-AQUAMAN ibihleli esiqongweni ngokufaka imali njengoba bese ifinyelele ku-r43 450 073:
1. AQUAMAN
2. BOHEMIAN RHAPSODY 3. BUMBLEBEE
4. MARY POPPINS RETURNS 5. ROBIN HOOD
6. INSTANT FAMILY
7. FINAL SCORE
8. SECOND ACT
9. RALPH BREAKS THE INTERNET 10. OLD MAN AND THE GUN