KULENGA IZEMBE KUYEYE NAKUMORGAN GOULD KWI-SUPERSPORT UNITED
LINGASE ligqashuke ifindo lomshado phakathi kwesupersport United nabadlali bayo asebehanjelwe yiminyaka njengoba kuvela ukuthi izikhulu zale kilabhu zicabanga ukubadiliza.
Isupersport izobhekana neBloemfontein Celtic kowe-absa Premiership namuhla ngesonto ngo-15h30 elucas Moripe Stadium, e-atteridgeville. Umqeqeshi wesupersport, ukaitano Tembo, uya kulo mdlalo nje, unqunyelwe ugwayi katiki njengoba eyalelwe ukuba aguqule isimo kule kilabhu kungenjalo ibhantshi lizogcwala umoya.
Leli phephandaba lithole ukuthi isupersport isezinhlelweni zokukhuculula abadlali asebekhulile abazophelelwa yizinkontileka ngokusongwa kwesizini.
Kuthiwa kubadlali ecabanga ukubadiliza kungabalwa umorgan Gould (35) odlala emuva noreneilwe “Yeye” Letsholonyane (36) odlala esiswini. Bobabili laba badlali ziyaphela izinkontileka zabo nale kilabhu.
Utembo ebuzwa ukuthi ngabe usabadinga yini laba badlali ekilabhini yakhe njengoba kuvela ukuthi uyakholelwa kubadlali abasebancane, uthe: “Akukho engingakuphawula ngalaba badlali ngoba udaba lwabo lusingethwe ngabaphathi. Into emqoka kimina njengamanje yilo mdlalo okufanele siwugijime neceltic.
“Kufanele siphendule amatafula ngalo mdlalo. Sesiside isikhathi sigcine ukunqoba. Isimo kasisihle, abaphathi kabeneme ngemiphumela yakamuva nami ngokunjalo kangijabule neze.
"Kodwa-ke nginethemba lokuthi sizowunqoba lo mdlalo, imimoya iphezulu futhi ngikhulumile nabadlali bami ngobumqoka bokuwunqoba,” kusho utembo.
Komunye umdlalo we-absa Premiership, ipolokwane City izobhekana nebidvest Wits namuhla ngesonto ngo-15h30 e-old Peter Mokaba Stadium, epolokwane.