ESKHALENI:
UKUDLULA emhlabeni ngokuzuma kukaphilemon “Chippa” Masinga sekushiye umbuzo wokuthi kungani kwagcina ngabo omasinga ukuthi iningizimu Afrika ikhiqize ulozolo lwabagadli abakwazi ukuphakamisa igama lezwe emazweni omhlaba.
Umasinga ungomunye wabadlali abaqunge isibindi bayodlala phesheya kwezilwandle ngezikhathi ezinzima.
Uphenduke isilomo e-england nase-italy okungamazwe adlale kakhulu kuwona. Angithandi ukugxeka kakhulu isouth African Football Association (Safa) ngokukhahlelela ngaphandle abadlali bakudala ezinhlelweni zayo, ngoba vele iholwa ngabantu abacabangela izisu zabo futhi ababukeka bengenandaba nokuthuthukiswa kwebhola kuleli.
Iningizimu Afrika ngabe kayikho kule nkinga yokuntula abagadli ukuba kukhona kwisafa oke waba nombono wokuvulwa kwesikhungo sokuthuthukiswa kwabadlali.
Ngiwuthandile umbono kafarouk Abrahams wokuvula isikhungo sokuvundulula nokuthuthukisa onozinti kuphela ecape Town.
Angingabazi ukuthi ukuba kukhona nesikhungo sokukhiqiza abagadli kuleli, ngabe kasilokhu sibalisa ngokuthi akusaqhamuki mgadli obatshazwayo eningizimu Afrika.
Okubuhlungu wukuthi sigcina sesijabulela impumelelo yabadlali basemazweni ase-afrika abaqhulula amagoli sengathi bayabukisa phesheya kwezilwandle.
Kubona ngingabala umohammed Salah wase-egypt nosadio Mane wasesenegal abadlala kwiLiverpool ezihola phambili kwilog ye-english Premiership noPierre-emerick Aubameyang wasegabon ongumgadli we-arsenal.
Bobabili usalah no-aubameya- ng babambene ngamagoli angu-14 kanti yibona abazihola phambili ngokuhlohla amagoli kwipremiership. Elakuleli selokhu ligcine ngobenni Mccarthy ukuthi libe nomgadli okukhulunywa ngaye kule ligi ehlonishwayo emhlabeni ngesikhathi esagijima kwiBlackburn Rovers.
Ubenni kuke kwasongwa isizini ebalwa nabagadli abaqavile kwipremiership.
Ukunganikwa kwabadlali bakudala amathuba kwisafa, kubukeka kunomthelela ekubhimbeni kwezinto kunobhutshuzwayo wakuleli. Angicabangi ukuthi umuntu olidlalile ibhola ezingeni elikhokhelayo, angakuvumela ukuthi life ngaphansi kwakhe, futhi kangiboni engalenza imboni yokuzicebisa.
Abadlali baqheliswa ngisho bezama ukungena ezinhlakeni zesafa.
Ngikhumbula kahle ngoba umasinga ubekhona ohlwini lwabebephakanyiselwe ukungena ebuholini bukazwelonke besafa nyakenye, kodwa wakhahlelelwa ngaphandle. Ulucas Radebe ungomunye obekuhlongozwa ukuthi angene ebuholini bale nhlan- gano, kodwa kwaqhakanjiswa ukuthi akekho ezinhlakeni zobuholi bale nhlangano.
Kuyamangaza-ke nxa sekuvumbuka udanny Jordaan ohola isafa esethi kunomsebenzi obuzonikwa umasinga kule nhlangano.
Nokho-ke le nkulumo kajordaan kayethusi ngoba vele uyindoda esikhombise kaningi ukungabi namahloni, ehlale yenza izethembiso ezingafezeki njengoba izinto zimapeketwane kule nhlangano, ehlulwa ngisho wukuhlinzeka izifunda ngemali.
Ujordaan kuyacaca ukuthi akabezwa abadlali bakudala kwisafa ngoba wazi kahle ukuthi banogazi kubantu bakuleli, okungenza kungabi lula ukuthi baphenduke izichuse zakhe.
Phela kwisafa nxa uphikisana nojordaan, kusuke sekuphelile ngekusasa lakho kunobhutshuzwayo, kwazise ufuna labo abavumela konke akushoyo.