Umicho uxwayisa abadlali ngengozi
Uthi ukuvuvukalelwa ngamakhanda kungabalimaza kowecaf
UXWAYISA abadlali bakhe ngengozi umqeqeshi weOrlando Pirates ebukeka iza kahle emidlalweni yecaf Champions League.
Ibucs iguqise ngo-3-0 ihoroya yaseguinea koka-group B wecaf Champions League ngolwesihlanu kusihlwa e-orlando Stadium, esoweto.
Amagoli okunqobe ngawo ibucs abekwe enethini nguthembinkosi Lorch nojustin Shonga amabili.
Ibucs yiyona esiqhwakele kuleli qoqo bese ilandelwa yi-esperance yasetunisia ehlule ngo-2-0 iplatinum yasezimbabwe ngalo ulwesihlanu ntambama.
Umqeqeshi webucs, umilutin Sredojevic, uxwayisa abadlali bakhe ngokubaluleka kokuzithoba uma udlala kulo mqhudelwano.
“Ngizoqala ngokudlulisa amazwi enduduzo kubantu baseningizimu Afrika ngokulahlekelwa nguphilemon Masinga. Le wini ngizothanda ukuyibhekisa kuyena.
"Ngijabule impela ngalo mphumela kodwa ngizothanda ukuxwayisa abadlali bami ngokuthi bangalinge bavuvukalelwe ngamakhanda ngoba nakhu siqhwakele. Kufanele bahlale njalo bezithobile ngoba uma bezozikhukhumeza sizozithola sisengozini ngoba akudlalwa kulo mqhudelwano, iyashisa insimbi.
"Uhambo luselude, kunezivuva- ba eziningi okusafanele sidlule kuzona.
"Ngenyanga ezayo nje sizobhekana ne-esperance engumqansa kabi.
"Kodwa-ke sizolwa ngoba ithuba lokudlulela esigabeni esilandelayo sinalo,” kusho usredojevic.
Ulorch uthi konke kuhambe ngendlela abebeyihlelile.
“Amasu omqeqeshi nethimba lakhe asebenzile kulo mdlalo konke kuhambe ngokohlelo.
"Sibonga kakhulu kubalandeli bethu ngokuphuma bazoseseka.
"Siyacela ukuthi baqhubeke nokwenza le nto abayenzile ngoba kula mazwe angaphandle bayasicindezela.
"Emdlalweni wethu neplatinum nje, inkundla ibigcwele phama basithwalisa kanzima abalandeli bakhona.
"Nathi siyacela ukuthi abantu baphume ngobuningi babo uma sidlalela ekhaya noma ngabe akusibona abalandeli bepirates. Phela simele iningizimu Afrika kulo mqhudelwano hhayi ipirates,” kusho ulorch.
Ipirates izokuba nenhlanhla yokubhekana ne-esperance ekuhambeni kungekho balandeli enkundleni.
Le kilabhu ihlawuliswe yicaf ukudlala ibukwa yizihlalo ngenxa yokuziphatha budlabha kwabalandeli bayo.
I-esperance yiyona evikela lo mqhudelwano. IBANYANA Banyana ihlulekile ukuhlonipha ngokukhethekile uwinnie Mandela (ongasekho) ihlulwa yinetherlands ngo-2-1 emdlalweni wewinnie Madikizela-mandela Challenge izolo ngomgqibelo ntambama, ecape Town.
Ibanyana bekulindeleke ukuthi iwakhiphe wonke amangwevu kulo mdlalo kwazise isajabulela ukuhlonishwa kukadesiree Ellis ongumqeqeshi wayo nokuhlabana kukathembi Kgatlana ngomklomelo wokuba ngumdlali ovelele kwabesifazane e-afrika nowokushaya igoli lonyaka ngaphansi kwecaf.
Ibanyana ibiqala ukungena ensimini kulo nyaka, kanti unyaka odlule iwusonge ngegiya eliphezulu. Ukgatlana nguyena oshayele ibanyana igoli lokubika kowayizolo. Inkundla ivulwe ngusherida Spitse umdlalo usanda kuqala kwathi igoli lesibili lezivakashi lashaywa nguvivienne Medema.