KUZOQOKWA IBAMBA LESIKHASHANA LEKHOMISHINI
ISONTO eliphethwa namhlanje lishiye abaningi abalandela okwenzeka kwikhomishini ephenya ngezinsolo zokubhozonyelwa kombuso ( state capture), eholwa ngudeputy Chief Justice Raymond Zondo, bebambe ongezansi ngenxa yobufakazi obushaqisayo obethulwe ngu-angelo Agrizzi obeyisikhulu enkampaneni ebiyaziwa ngebosasa, kodwa manje esiqanjwe ngokuthi yi-african Global Services.
Ubufakazi buka-agrizzi budwebe isithombe esicace bha, esikhomba ukuthi inkohlakalo eningizimu Afrika ikuliphi izinga nokuthi ijule kanjani. Singasho ukuthi ubufakazi bakhe bufana neqatha elimi emphinjeni njengamanje kwabaningi abathintekayo, phakathi kwabo okubalwa neqembu elibusayo I-ANC.
Indlela obujule ngayo ubufakazi obethulwe ngu-agrizzi buholele nasekubeni ongunobhala wale wekhomishini, udkt Khotso De Wee aphume ngomnyango njengoba eyiswe ekhefini eliyisipesheli ngemuva kokuthinteka kwegama lakhe. Njengamanje kulindeleke ukuba ikhomishini iqoke omunye unobhala ozobamba esikhundleni sokuba ngunobhala wayo.
Kusolakala ukuthi udkt De Wee wathola inkokhelo kwibosasa ngethenda yango-2013 ngesikhathi eyi-chief operating officer emnyangweni wezobulungiswa nokuhlunyeleliswa kwezimilo.
Ebufakazini bakhe u-agrizzi uveze ukuthi ibosasa ibikhokha izindodla zemali engaphezu kuka-r4 million ngenyanga zemigwazo kubantu abehlukene, okubalwa izikhulu zikahulumeni, nezikhulu ezinkampanini ezehlukene.
Kwi- video eyaqoshwa busululu enkampanini ibosasa edlalwe esidlangaleni ngesikhathi kuqhubeka ukulalelwa kobufakazi, kuvela ugavin Watson, oyiceo yale nkampani, ebala imali engaphezu kuka-r900 000 engukheshi okuthiwa yayizosetshenziswa njengomgwazo.
U-agrizzi uphinde waveza nokuthi ibosasa yakhokha kwiANC cishe u-r2 million owawuzosetshenziswa emikhankasweni yokhetho.