KULINDWE ISINQUMO SENKANTOLO
I-ANC ithi ilinde isinqumo senkantolo ngodaba lwecala elibhekene nephini likasihlalo wayo Kwazulu-natal, umnu Mike Mabuyakhulu ( osesithombeni).
Umnu Mabuyakhulu nabanye osomabhizinisi okubalwa kubona umnu Ceaser “Maqhoboza” Mkhize, umnu Mabheleni Ntuli, umnu Mzwandile Basil Ninela, unkz Nonhlanhla Brenda Ninela, Nothando Lorraine Zungu, untokozo Ndlovu nonjabulo Mbongwe Mkhize babhekene namacala enkohlakalo athinta u-r28 million owawukhishelwe ukuba kwenziwe inorth Sea Jazz Festival, eyagcina ingenzekanga.
Ngolwesine oklebe nophiko olusebenza ukushaqa impahla, i-asset Forfeiture Unit (AFU), bagasele emizini kamnu Mabuyakhulu osempangeni, okamnu Ntuli osela Lucia nokaMnu Mkhize osebluff, kwashaqwa impahla okubalwa kuyo izimoto zikanokusho.
Ukuthinteka kukamnu Mabuyakhulu kubeka ikusasa lakhe engcupheni njengoba ngemuva kwengqungquthela YE-ANC yasenasrec, ngo-2017 leli qembu lathembisa ukulwa nenkohlakalo ngaphakathi, nokubhekana nalabo abathintekayo ezenzweni zenkohlakalo.
Unkz Nomagugu Simelane, okhulumela leli qembu KwazuluNatal, uvumile ukuthi esinye sezinqumo ezathathwa yileli qembu enasrec, ngesokulwa nenkohlakalo nokuvuselela iqembu kabusha.
“Nakuba kunjalo, kumele sazi ukuthi siphila ezweni elikhululekile nelinomthethosisekelo okucacisayo ukuthi wonke umuntu umsulwa kuze kuba utholwa enecala enkantolo yomthetho. Ngakho okwamanje ngeke siphawule ngodaba oluthinta iphini likasihlalo wethu njengoba kusaqhubeka uhlelo lwenkantolo,” kuchaza unkz Simelane.
Uthe bazohlonipha uhlelo lwenkantolo, balinde ize ithathe isinqumo. Uthe umnu Mabuyakhulu uzoqhubeka nemisebenzi yakhe yeqembu ngendlela ejwayelekile.
Njengamanje leli qembu limatasa libuyekeza amagama asohlwini alabo abazongena ephalamende nasezishayamthetho zezifundazwe ngemuva kokhetho lwakulo nyaka.