Bakhala bayazithulisa "abaqolwe izizumbulu"
Bebehlelelwa uhambo lokungcebeleka ekapa yilo somabhizinisi
ZIKHIHLA esikanandi izintokazi ezithi zigilwe ngusomabhizinisi wasethekwini ezimsola ngokubaleka nezizumbulu zemali.
Lo somabhizinisi obengumyeni kasaziwayo ongumlingisi oqavile emdlalweni kamabonakude owuchungechunge, uzalo, olusakazwa KUSABC 1, unenkampani yezokuvakasha - phakathi kweminye yemisebenzi ayenzayo okuwukuhlelela izivakashi amaholide.
Lezi zintokazi ezikhulume ne
LANGA Langesonto zithi zikhokhe imali enkulu enkampanini kalo somabhizinisi (esiligodlile igama lakhe) ngezizathu zomthetho, ebezizohamba ngayo ziye eholidini ziyongcebeleka, kodwa kuthe sekusondele isikhathi sokuhamba, waqala umlisa wangena ezintangeni, kwagcina sekunzima ukuxhumana naye.
Usinikiwe Phakathi wasewitbank, empumalanga, ongomunye walabo abakhihla isililo, echazela
ILANGA Langesonto uthe yena nabangani bakhe bebelokhu befaka imali kwi-akhawunti yalo somabhizinisi njalo ngenyanga kusukela ngoncwaba (August) ngonyaka owedlule.
Uthi imali ebese beyikhokhile ngu-r53 000 kanti bekumele kube ngu-r84 000 isiyonke. Uhambo lwabo oluya eholidini ecape Town beluzoba ngonhlolanja (February) nonyaka. “Njalo ngenyanga besilokhu sifaka lokho umuntu anakho kodwa hhayi okungaphansi kukaR1000.
"Kuthe ngokuhamba kwesikhathi uma sithi siyamfonela sangabe sisamthola nakuma- emails. Singene kufacebook sathola ukuthi kukhona abanenkinga efana neyethu, kodwa bona bese beyikhokhe bayiqeda imali sekumele bahambe,” kuchaza usinikiwe.
Uthi okumphatha kabi kakhulu wukuthi bebepatanisa, bonga ngoba bethi bayoziphumulela emuva kokusebenza kanzima.
“Angikakholwa kuze kube manje, ngathi kuzothiwa kuyadlalwa. Besizitshela ukuthi siyochitha izinsuku eziwu-4 siziphumulele ecape Town,” kusho usinikiwe ngokukhathazeka.
Leli phephandaba liphinde laxhumana nobuyisile Gamede wasevosloorus, egoli obekwelinye iqembu labesifazane obekumele lihambe ngolwezi (November) nyakenye, kodwa uhambo lwabhuntsha. Yena uthi imali abese beyikhokhile ngokuhlanganyela ingu-r120 000, umuntu ngamunye ubekhokha u-r8 000.
Nabo bathi bebeyikhokha kancane kancane kusukela ngondasa (March) ngawo unyaka owedlule. Uthi bake basebenzisana nalo mlisa ngo-2017, konke kwahamba kahle, ngaleso sikhathi babehamba bebabili. Kuthe ngonyaka owedlule base behlela nabangani bakhe abawu-14 ukuthi bazoya ecape Town futhi bazosebenzisa yona inkampani yalo mlisa ukuba ibahlelele yonke into.
“Bekumele sihambe mhla ka-29 kulwezi, sibuye mhla ka-3 kuzibandlela (December). Kuthe uma kuhamba isikhathi sibona ukuthi ayikho into eqinisekisa ukuthi konke sekumi ngomumo, saba nokwethuka.
"Ngomsombuluko evikini obekumele sihambe ngalo, wafona u... (esho igama likasomabhizinisi) wathi konke kuhamba kahle, usephothula amalungiselelo ohambo. Kuthe ngolwesibili uma ngimfonela ngangamthola, nabangani bami bamfonelile bangamthola.
"Ngolwesithathu sesibona ukuthi siphelelwa yisikhathi, safonela ihhotela obekumele silale kulona kwathiwa kubhukhiwe, kodwa akukhokhiwe. Uma sibheka amaflight kwathiwa nakhona kubhukhiwe kodwa akukhokhiwe,” echaza.
Emuva kwalokho kubacacele ukuthi kukhona okushaya amanzi, kwazise nalo mlisa ubengasatholakali. Ubuyisile uthi uze wafonela u... (egagula igama lobeyinkosikazi yalo somabhizinisi), ezama ukuthola ukuthi kanti ukuphi lo mlisa, nenkosikazi yazihlangula yathi ayimazi.
“Ngokuhamba kwesikhathi ngigcine ngimtholile (usomabhizinisi), wathi usesibhedlela ethekwini, ulaliselwe ukhwantalala ngenxa yokuthi imali ekhokhwe ngabantu ifakwe kwenye i-akhawunti yesisebenzi abesiqashile, sabaleka nayo.
"Ube esecela ukuba kuhlanganwe ngosuku olulandelayo esiteshini samaphoyisa ukuze abhale isitatimende sokuthi uzoyikhokha imali,” kuchaza ubuyi. Ngosuku olulandelayo uthi bamlinde kwaphela amahora amathathu esiteshini samaphoyisa kodwa wangaqhamuka.
Kuthe noma esefonelwa wangatholakala futhi. Bagcine sebevula icala lokweba esiteshini samaphoyisa eboksburg.
“Ngidinwe kakhulu ngesenzo sika.... Le nto iyangigulisa, hhayi kancane. Okubuhlungu ukuthi into ethinta imali iyabuqeda ubungani. Kubangani bami angisemuhle ngoba yimina obengumxhumanisi kuyo yonke le nto,” kusho ubuyi.
ILANGA Langesonto lizamile ukuxhumana nalo somabhizinisi kodwa ucingo lwakhe belukhala lungabanjwa. Uthunyelelwe nomqhafazo, kodwa kwaze kwashicilelwa engaphendulanga.
Okhulumela amaphoyisa asegermiston, ucapt Andre de Jager uvumile ukuthi likhona icala elivuliwe lokukhwabanisa, wathi kodwa akukho muntu oseboshiwe.
Lo mlingisi wozalo ethintwa YIILANGA Langesonto uvumile ukuthi uyalwazi lolu daba, bakhona abake baxhumana naye ngalo kodwa akakwazanga ukubasiza ngoba akasaxhumene nalo mlisa.