IYAFUNDISA INCWADI UBIZO LWAKHO
EKUGCINENI selize lashicilelwa ibhuku elilotshwe ngu Mfu MS Mncwabe ongumholi we Callings Promotions Ministries. Lona ngumbono osekunesikhathi eside efundisa ngawo eziteshini zemisakazo yomphakathi, nasephephandabeni ILANGA kanti muva nje usefundisa ngawo kwesinye sezikole zebhayibheli.
Yindaba enkulu lena lapho evula khona amehlo kulabo abasemsebenzini wenkosi okunabantu abangaphansi kwabo kodwa abangembulekelwe ngobizo lwabo. Ngaphandle kokuvula amehlo kubefundisi abakulesi simo ubuye futhi aqaphelise abathandayo ukusebenzela inkosi kodwa bedidekile ngokuthi kukuphi lapho bengabamba khona iqhaza.
Kule ncwadi uyafunda ukuthi akulungile ukulingisela abanye ngoba ubona bephumelela endleleni abenza ngayo. Futhi ahlukene amahhovisi obizo emsebenzini wenkosi nokusemqoka ukuba umuntu azazi ukuthi yiliphi abizelwe kulona.
Uyexwayisa futhi nangalabo okuthi ngoba bengaqashiwe bese bethi kungcono bangene emsebenzini wenkosi balibale ukuthi ukungaqashwa akuyona i- qualification yokuba ungene ebufundisini. Wenza isibonelo ngojesu Krestu ukuthi abafundi bakhe wayebabiza besemisebenzini abebeyenza. Futhi uyayichaza indaba yobizo ukuthi ayipheleli ekubeni uphathe umbhobho bese ukhuluma nabantu ngoba kuningi okwenziwa ezinkonzweni ngaphandle kokushumayela.
Uma ungaculi nekhwaya kukhona ongase ukwenze kokwelekelela ukuba umsebenzi wenkonzo uphelele. Uyakuveza futhi nokuthi ubizo akusilona olokuba kusizakale wena ngalo kepha ngolokuba kusizakale abanye abantu ngawe. Nokho kubukeka usizo lwayo lungafinyelela kwabaningi nxa itholakala ngolimi lwesizulu.