Usovalweni umndeni womlingisi wesibaya

Kudedelwe ngebheyili abasolwa ngokuzama ukubulala umyeni kazinhle

ULALA obenyoni umndeni womlingisi womdlalo kamabonakude, Isibaya, olingisa indawo kasihle, kodwa ogama lakhe langempela nguzinhle Mabena-ngwenya, oshade nosomabhizinisi wasenorth West, urobert Ngwenya.

Lokhu kulandela ukuba kudedelwe ngebheyili yinkantolo yemantshi ebrits, abantu abathathu abasolwa ngokuzama ukubulala urobert ngonyaka odlule.

Urobert odabuka emaboloko ngaphandle kwasebrits, enorth West, kuthiwa walalelwa unyendle ngamadoda amathathu ebuya emhlanganweni womphakathi njengoba engusihlalo webhodi elibizwa ngevillages, Townships and Small Dorpies Chamber of Commerce (VTSD) elwela ukuba umphakathi wezindawo ezakhelene nezimayini uqashwe kulezo zimayini.

Ekhuluma NELANGA Langesonto urobert, uthe ukhathazekile ngempilo yakhe neyenkosikazi yakhe ngemuva kokuvela kokuthi abasolwa bakhishiwe ezitokisini.

“Angiwuqondi ukuthi umthetho ubuye usebenze kanjani. Laba bantu abakufihlanga ukuthi bangifuna ngifile. Baze bakubeka kwacaca ukuthi uma bengaphumeleli, bazobamba umfazi wami futhi bayazi ukuthi kulula ukumthola,” kusho urobert.

Uthe into abafuna ukumbulalela yona, yilesi sikhundla akusona ngenxa yokuthi ukwenza kube nzima kwabanye abantu ukuba bathole amathenda.

“Kubuhlungu khona uma sebevele bakhishwa. Iyangidida nje impela le nto ngoba bese ngithembele kwingalo yomthetho ukuze kuphephe mina, umkami nezingane zami,” kuqhuba yena.