LIGQABUKILE ELOMSHADO KUZULUBOY NOMKAKHE
UZIKHOTHA amanxeba usaziwayo ongumculi ophinde abe ngumlingisi, uzuluboy, ngemuva kokugqashuka kwefindo lomshado phakathi kwakhe nenkosikazi yakhe, ebiphinde ibe yimenenja yakhe ngokomsebenzi, u-andiswa Gebashe, ababophe ifindo likasofasilahlane ngo-2014.
Uzuluboy ogama lakhe langempela ngumxolisi Majozi, akananazanga ngesikhathi intatheli YELANGA Langesonto imbuza ngesehlukaniso somshado wabo.
Ukhulume ngokukhululeka, wavuma ukuthi isidatshuliwe incwadi yabo yomshado nokuthi sekuneminyaka emibili behlukene nenkosikazi yakhe abanendodakazi esineminyaka eyisihlanu.
“Sesineminyaka emibili singasathandani, kanti nesehlukaniso sesize safinyelela emaphethelweni. Njengamanje usengu- ex wife wami,” kusho uzuluboy.
Eminyakeni eyedlule kuke kwasabalala amahlebezi okuthi laba bobabili abasalali nasembhedeni owodwa ngenxa yokungahambi kahle kwezinto emshadweni wabo.
Yize zingacaci kahle izizathu eziholele ekubhidlikeni kwalo mshado, kodwa umthombo waleli phephandaba osondelene nalaba, uthi izinto ziqale ukonakala kakhulu kusukela ngesikhathi kungasahambi kahle kuzuluboy ngakwezemali, ikhaya selibanjwe ngu-andiswa, osebenza njengomhumushi wabakhuluma ngezandla kumabonakude, nakwezinye izindawo. Kuthiwa ngisho nasekamelweni ibingasekho injabulo, ikhaya selibanda.
“Ukungahambi kahle kwezinto kuze kwakapakela nasemsebenzini, kwaphoqa ukuba u-andiswa ashiye phansi ukuba yimenenja kazuluboy. Kusukela bekhetha ukuhlala ngokwehlukana kube yisikhathi esinzima kakhulu kubona bobabili,” kusho umthombo.
Yize uzuluboy ekhulume ngokukhululeka KWILANGA Langesonto ngokwehlukana kwabo, kodwa wale waphetha ukudalula izizathu ezibahlukanisile.
Uthe ukwehlukana kwabo akusho ukuthi baxabene, ngakho-ke kubalulekile ukuvikela isithunzi sabo.
“Bangathini nje abazali bethu uma sebefunda izindaba zethu ezijule kangaka emaphepheni?
"Uma u-andiswa ekhuluma ngeke ngimnqabele, kodwa mina ngizohlonipha isithunzi semindeni yethu,” kusho yena.
Ethintwa u-andiswa, ucele ukuba kuxhunyanwe nozuluboy.
“Akekho umuntu owazi iphimbo lami kodwa bazi elikazuluboy, ngakho ngicela ukhulume naye ngakho konke ofisa ukukwazi. Mina nendodakazi yami kasibona osaziwayo, umuntu odumile nguyena,” kusho yena.
Uzuluboy yize aduma ngokucula, kodwa uke walingisa nasemidlalweni kamabonakude okubalwa kuyona nozalo nasemidlalweni ehlukene yeshashalazi, futhi uke waba nangumsakazi wokhozi FM. makhoba@ilanganews.co.za