KUSHONE UMBHALI WEZINCWADI
UGQEMEKE engeqiwa ntwala umkhakha wezokubhalwa nokushicilelwa kwezincwadi, ngokudlula emhlabeni koqweqwe lombhali obedumile, udkt Charles Mungoshi, wasezimbabwe.
Izindaba zokushona kwakhe zisabalale izolo ngomgqibelo ngemuva kokuba ziqinisekiswe wumndeni wakhe. Kubikwa ukuthi ushonele esibhedlela eharare khona izolo.
“Kubuhlungu ngale ndlela engachazeki ukushona kukababa wethu, udkt Charles Mungoshi. Ubesegule iminyaka ewu-10 ngenxa yokuthinteka kwemithambo, kwagcina kumenele namuhla ekuseni (ngomgqibelo) eparirenyatwa Hospital,” kusho isitatimende esikhishwe wumndeni kamufi.
Igalelo lakhe ekubhaleni izincwadi, limenze wahlonishwa emazweni ehlukene, wawina nezindondo.
Ushicilele izincwadi ezingu-18, phakathi kwazo okubalwa ethi Waiting for the Rain (1975), The Milkman Doesn't Only Deliver Milk (1981), Coming of the Dry Season (1972), Branching Streams Flow in the Darkness (2013) nezinye.
Uke wahlabana ngomklomelo we-commonwealth Writers’ Prize, ngaphansi kwe- category ibest Book in Africa, futhi wamenywa ukuyohlangana nendlovukazi yamangisi, u-elizabeth II, kanti enye yezinkondlo zakhe inamekwe ekomkhulu le-bill and Melinda Gates Foundation, eseattle, ewashington njengengxenye yombukiso.
Ngo-2003 uhlonishwe ngeziqu zobudokotela yi-university of Zimbabwe, emuva kokuhlomula ngenqwaba yezindondo.
“Sizizwe singabakhethekile ukuba sibe nodkt Mungoshi, obenothando, engumyeni onakekelayo kujesesi, enguyise kufarai, ugraham, unyasha, ucharles, notsitsi, ewumkhulu kubazukulu abangu-7,” kusho umndeni. tzondi@ilanganews.co.za