SEKULINDWE USUKU KOLWAKWASHEMBE
SELUSESIGABENI sokucutshungulwa yinkantolo enkulu yokweDlulisa amacala, ebloemfontein, udaba lombango wobuholi ebandleni lamanazaretha, ophakathi kohlangothi lwasethembezinhle oluholwa yinkosi Phinda Shembe nolwasebuhleni oluholwa yinkosi umduduzi "Nyazilwezulu" Shembe. Ngokuthola KWELANGA
Langesonto kubameli balezi zinhlangothi, izimpikiswano zabo sezisezandleni zamajaji ale nkantolo osekuyiwona azothi uma eseqedile ukuzicubungula bese ebazisa ngosuku lokuqulwa kwecala.
Lolu daba seluze lufike kulesi sigaba nje, yingoba uhlangothi lwasebuhleni alwenelisekile ngezinqumo zenkantolo yasethekwini eyavuna uhlangothi lwaseThembezinhle ngokuthi umholi ongasekho wakhona, inkosi uvelaMuhle "Imisebeyelanga" Shembe nguye owayefanele ukuhola ibandla lamanazaretha asebuhleni emuva kokukhothama kwenkosi Vimbeni "Thingolwenkosazane" Shembe ngo-2011.
Udaba lwedluliselwa enkantolo enkulu yamajaji emgungundlovu, kwafika kwaba nokwehlukana kwemibono phakathi kwamajaji amathathu, elinye lavuna abaseBuhleni, amabili avuna ithembezinhle.
Yingaleso sizathu abasebuhleni babona intuba yokuthi kungenzeka inkantolo enkulu yokwedlulisa amacala ebloemfontein, ivune leli jaji elilodwa elagcizelela ukuthi ubufakazi benkosi yamaqadi, umqoqi Ngcobo obachithwa yijaji lasethekwini, u-achmat Jappie, babukholeka, yize babungabhaliwe phansi.
Laze lakhala ngezazimthetho ezingawaqondi amasiko esintu nawebandla lamanazaretha.
Lawa amabili athi uma kusalandelwa umthetho obusa izwe, ubufakazi obulotshwe phansi yibona obunesisindo kunalobu bomlomo.
Phela inkosi yamaqadi yasukuma ngosuku lomfihlo wothingo, yathi yayalezwa yilo ukuthi ozongena ezicathulweni zalo uma kwenzeka luhamba yinkosana yalo unyazilwezulu, kanti ummeli wothingo ngaleso sikhathi, umnu Zwelabantu Buthelezi, wayephethe incwadi okuthiwa yayibhalwe yilona uthingo ibeka Imisebeyelanga.
Abameli basemajajini abamele lezi zinhlangothi ngu-adv Archie Findlay wasethembezinhle no-adv Rajesh Choudree waseBuhleni. knowledge.simelane@ila-nganews. co.za