IDUME YADLULA I-
YAKHELE ngemaqubu enye ezinkundleni zokuxhumana njengoba i"men's Conference” yangoLwesine, idume ukwedlula ivalentine’s Day uqobo.
Obekugqame kakhulu ngale “Men’s Conference” wukuthi iveze amadoda njengabantu abebebalekela ukuchitha isikhathi nezithandwa zawo kanye nokuchitha imali ethenga izipho futhi etetemukisa abathandiweyo.
Indlela obekwenzeka ngayo, ubungaze ufunge ukuthi ikhona ngempela le ngqungquthela kanti bekudlalwa umaphicaphicana. Ezinkundleni zokuxhumana bekupendwa isithombe sokuthi kugcwele kuyanyinyitheka lapho amadoda ebebuthene khona, futhi kumnandi ngendlela yokuthi kufanele akhohlwe yizithandwa zawo.
Bekufakwa izithombe zabantu abehlukene besilisa, okubalwa kubona nosaziwayo, bevezwa sengathi nabo bayingxenye yayo. Owake waba ngumengameli wezwe, umnu Jacob Zuma, naye sike safakwa esakhe isithombe ebingelela abantu, kwase kubhalwa ukuthi “ubaba usefikile”.
Ezinye zezithombe obuhlangabezana nazo ezinkundleni zokuxhumana, bekukhona ezamadoda abehamba eyiqulu bese kuba nombhalo othi “siyakhona”; kubonakale amanye sengathi ayabaleka, uma ebuzwa athi aya kwi- conference; kukhona esinebhanoyi sibhalwe ukuthi liyatheleka ibandla; kwesinye imoto ibonakala ifile emgwaqweni bese kubhalwa ukuthi siyeza sisendleleni; kuvela indoda ibanjwa ngesidlozana kuthiwa ibonakale ithumelele umkayo i-e- wallet; kukhona lapho kuvela amadoda ebaleka kuthiwa bese kushaye isikhathi sokuba kuhlolwe igazi.
Impela kuleli sonto ibe ngundabamlonyeni le "Men’s Conference”.