UMLANDO KWETHULWA ILIGI YAMAKHWAYA
KUQOPHEKE umlando ngesonto mhla ka-9 February 2019 emini bebade e-inkosi Albert Luthuli International Convention Centre (ICC), ethekwini ngenkathi kwethulwa iligi yamakhwaya omculo wengcwenga, i- classical music ngolwasemzini. Lona ngumbono oqhamuke nabanumzane uwiseman Mkhize nomsizi Mnyandu beclermont Choir Foundation, okuyikhwaya esizakhele igama kwabaningi ngezinhlelo zokuthuthukisa umculo walolu hlobo.
Phakathi kwezihambeli eziqavile ebezethamele lo mcimbi bekukhona umnu Nathi Mthethwa onguNgqongqoshe womnyango Wezobuciko Namasiko kuzwelonke, unkk Bongi Sithole-moloi ophathiswe umnyango Wezobuciko Kwazulu-natal, umnu Thembinkosi Ngcobo oyisikhulu kumasipala wetheku, unkk Lindiwe Rakgarebe oyisikhulu esengamele I-ICC, nabanye.
Inkundla ivulwe yikhwaya yesikole samabanga aphakeme, impangeni High esixube izinhlanga esicule ngezilimi ezahlukene, kuhamba phambili isiZulu. Uhlelo beluphethwe ngobuciko namahlaya uthokozani Mamkhize-ndlovu wesiteshi somsakazo Ukhozi FM, nosimo "Seemorepossilites" Nzama.
Iligi lena iqalwe ngamakhwaya angu-7, okuyilawa: SA Singers, Sound of Joy Chorale, Thokozani Chorale, African Chorus, Urban Voices Chorale, Durban Serenade Choral Society nejoyful Sounds.
“Kafushane umbono ngale ligi wukuba amakhwaya nababhidisi bawo baqeqesheke kangcono nokuba ikhwaya iphathwe njengebhizinisi, kungahlalwa nje kulindwe imicimbi emikhulu njenge-old Mutual National Choir Festival,” kusho umnu Mkhize. Emazwini awethule kulo mcimbi umnu Mthethwa, uthe lolu hlobo lo mculo lunomlando omude nangesikhathi somzabalazo kodwa manje alusanakiwe.
“Okwenzekayo wukuba ikhwaya emenyiwe ukuzocula enamalungu angu-40 kuya ku-60 inikwe u-r5 000, kuthi umculi oyedwa wolunye uhlobo lomculo anikwe u-r90 000 okuyinto engenabo ubulungiswa, kusho ungqongqoshe.
Izingoma eziculiwe bekungamanoni aqanjwe yizingwazi okubalwa kuzona abanumzane uphelelani Mnomiya, Qinisela Sibisi nokwanele Jona kanti abephelezelwa kamtoti ngopiyano ngusanele Mkhize.
Kafushane umbono ngale ligi wukuba amakhwaya nababhidisi bawo baqeqesheke kangcono...
IMIPHUMELA
Ikhwaya ephume phambili kube yijoyful Sounds yakwabester ebhidiswa nguphumlani Khuluse, isibili kwaba yi-african Chorus yasemlazi ebhidiswa ngudkt Mongi Mzobe, kwathi isithathu kwaba yiUrban Voices Chorale yasemlazi ebhidiswa ngukhulekani Khumalo.