Ubabes umangaze abantu ngengoma kamampintsha
Ubabes akanandaba ukuthi abantu bathini, inqobo uma ebajabulisile ngomculo
UBUKEKA ekushaya indiva umculi we- gqom, ubongekile “Babes Wodumo” Simelane, ukugxekwa kukamampintsha ngokukhipha ingoma enamagama athi “Khon’ ingane lay’ndlini”, okungamagama azwakala umampintsha ewasho kwi- video abonakala kuyona eshaya ubabes, eyasabalala ezinkundleni zokuxhumana.
Emuva kokuba umampintsha egabise ngale ngoma enesigqi se- gqom, kube nemizwa eyahlukene, abanye beyincoma, abanye bethi umampintsha ukhombise ukungazisoli ngesenzo sokushaya ubabes, kunalokho ubone ithuba lokwenza imali ngokuqhamuka nayo le ngoma.
Lo msindo nokugxekwa kukamampintsha, kubukeke ekushaya indiva ubabes ngesikhathi enandisa kwiwine Wednesdays, ngolwesithathu ethekwini.
Ngesikhathi enandisa ubabes, uzwakale ecaphuna la mazwi abewasheba nemidanso yakhe aziwa ngayo, kwachwaza izihambeli kulo mcimbi.
Babodwa abebethi laba kabavele bawesule amacala abavulelene wona, abanye bethi le ngoma ingenye yezizobashukumisa igazi, zibafudumeze ezindaweni zemijuxuzo njengoba kuza ubusika.
Kuzokhumbuleka ukuthi emuva kokuba ubabes evulele umampintsha icala lokushaya, nomampintsha wavula elakhe ekhala ngokuhlukunyezwa ngubabes.
Umsunguli wewine Wednesdays, umnu
Lindo Buthelezi, uthe akakwexwayi okwenziwe ngubabes.
“Ubabes ngumuntu wabantu, umsebenzi wakhe wukujabulisa abantu. Ngingamfanisa nabaculi ulebo
Mathosa nobrenda
Fassie abangasekho emhlabeni, ababengenandaba nokuthi abantu bathini, inqobo nje uma bejabulile.
"Laphaya ubemenywe ukuyonandisa futhi kuyacaca ukwazile ukucabanga ukuthi yini angayenza ukujabulisa abantu,” kusho umnu Buthelezi.
Baphawule kanjena abalandeli:
@amandambona3: Wenza kahle wena Babes usikhombise ukuthi eyababili ayingenwa. Angikaze ngiyingene futhi angisoze.
@pearl.cele: Bese nilokhu nimdabukela-ke uma eseshawa. Laba basuke bazi ukuthi benzani. Bese bephelelwe ngamaqhinga, balwa kwaphuma ingoma. Ngiyema lapho.
Kuzokhumbuleka ukuthi le khaphuli (ubabes nomampintsha) ihlale isematheni abezindaba ngokuxabana kwayo. Phambilini ubabes Wodumo waze waveza ukuthi ngesikhathi umampintsha emthela isibhaxu, waze wamephula umlenze wangakwazi ukuhamba.
Kwaba sengathi bayehlukana, kwaphinda kwezwakala ukuthi sebephinde babuyelana. ayandab@ilanganews.co.za