Ubhekene nomqansa umqeqeshi wechiefs
Uphoxwa ukungalulami kwabadlali abamqoka
EZIBUHLUNGU kumqeqeshi wekaizer Chiefs njengoba izinto zingahambanga ngendlela abelindele ngayo ekubeni ezakhe zibhekene nomdlalo omqoka.
Ichiefs izobhekana necape Town City kowenedbank Cup namuhla ngesonto ngo-15h00 embombela Stadium, enelspruit.
Ichiefs iya kulo mdlalo nje, inengcindezi njengoba abalandeli bayo beyifuna le nkomishi njengoba bebona kuyiyona abasethubeni lokuthi bayithole.
Nomqeqeshi wale kilabhu u-ernst Middendorp akakufihli ukuthi iyona asebeke ithemba kuyona.
Nokho lo mqeqeshi uveze ukuthi ubelindele ukuthi uzoya kulo mdlalo ulebohang Manyama odlala esiswini no-eric Mathoho odlala emuva sebeluleme njengoba bejima ngokugcwele nekilabhu.
Uthi uphoxeke kakhulu ezwa ukuthi laba badlali abakakulungeli ukudlala.
Ichiefs ivele ihaqwe yizinkinga zokulinyalelwa njengoba u-itumeleng Khune, Happy Mashiane nonkosingiphile Ngcobo nabo belimele.
“Kunzima ukuba ngumqeqeshi ikakhulukazi uma ulinyalelwe kuvele kube sengathi ufile ube
uphila.
"Laba badlali bengilindele ukuthi bazoba yingxenye yalo mdlalo ngoba bakhombisa ukuba bukhali.
"Ngiphoxekile uma ngizwa ukuthi abakakulungeli ukudlala ngeke ngikwazi ukubaqoka.
"Kodwa-ke kufanele silwe nalaba abakhona yibona okufanele benze umsebenzi.
"Icity idlala kahle siye ekhefini isefomini ngeke ibe lula.
"Kodwa-ke sizokwenza ngakho konke okusemandleni ukuthi siyawunqoba lo mdlalo,” kusho umiddendorp.
Ubenni Mccarthy ololonga icity uthi akanalo noluncane uvalo ngeChiefs.
“Ngikholwa wukuthi ayikho ikilabhu enkulu manje sekungamagama nje amakhulu wonke amaqembu aseyalingana akusafani nakuqala.
"Lo mdlalo ngeke nje uzishaye isifuba uthi uzonqotshwa yichiefs njengakuqala.
"Nami nje angiyesabi buka nje, sifika sesinezinkomishi esizinqobile okusho khona ukuthi nathi siyikilabhu enkulu.
"Kulo mdlalo siyohlasela ukuthi kuzobe kukhona abalandeli bayo asinandaba.
"Asinavalo noluncane ngabo kodwa uma beke benza iphutha lokusithatha kancane bazoba senkingeni,” kusho umccarthy.