UBATHUNUKE IZILONDA UMCIMBI KAKHUZANI
UVUSE isilonda ebesivele sibhibha kubaphathi bemisakazo umcimbi wayizolo owaziwa nge#Gcwalisa imabhida Masikandi, osungulwe ngumculi kamasikandi, ukhuzani Mpungose.
Lesi silonda ngesokuvalelwa ngaphandle kweziteshi zemisakazo yomphakathi emicimbini emikhulu. Kulo mcimbi bekunenqwaba yabaphathi bohlelo abathathwe eziteshini ezinkulu, nokusukumise ulucky Dlamini, wevibe FM wazwakalisa ukuthi akeneme ngalokhu.
Uthi kuziwa kubona uma kusaphushwa umcimbi, kodwa uma sekufika usuku lomcimbi, abanikwa bona ithuba lokuphatha uhlelo, luphathiswa abokhozi FM.
Enxuswa ukwenaba ngalesi sitatimende nabesekwa kusona ngabaningi, uthe basebenza kakhulu nabaculi ababuye bahlele imicimbi.
“Beza kithina uma besaphusha ama-cd nesikwenza mahhala. Kwenzeka into ecishe ifane noma sekwenziwa imicimbi, kodwa uma sekunemali yokukhangisa, kasibalwa, nabasakazi bethu (ababe besaqashwa) ekuphatheni izinhlelo. U-R5 000 ungenza umehluko omkhulu kumuntu okwicommunity Radio.
"Umasikandi sisondelene kakhulu nawo njengoba sakhelene nehostela ikwamashu. Uma ukhuzani eze la akuhambeki nokuhambeka evibe. Bafaka abantu ongazi bahlanganaphi nomasikandi. Sizoba nomhlangano ngoba nabama-satma Award namaCrown Gospel Music Award, saze sababizela umhlangano. Kasifuni ekugcineni kube sengathi sicekela phansi ezokuvakasha ethekwini, isiphethe kabi le nto,” kusho yena.
Novela Xulu wezwi Lomzansi, okuyisona siteshi somphakathi esikhulukazi Kwazulu-natal, uhambe emazwini kadlamini, ejabulela nosomnyama Khumalo wezwi lomzansi obeqashiwe.
Usandile Ngema wembokodo FM, uthi nabo banezigidi zabalaleli Kwazulu-natal uma sebehlanganisiwe (beyiziteshi zomphakathi) kanti nomcimbi kakhuzani bawupromothe kakhulu, mahhala.
“Sisebenza kanzima singenalo noxhaso njengesabc ukwenza umsebenzi osezingeni elifanele,” kusho yena, engeza nangokuthi bazoyixoxa emhlanganweni le ndaba. Abehhovisi lokumaketha lendlamlenze Foundation bathi kabasiqondi isikhalo.
“Bebethumela izicelo abantu abafuna ukuba yingxenye yomcimbi. Mayelana nezikhangiso nokuqashwa kwabazophatha uhlelo, bekumele nabo beze ngaphambili, bangalindi ukuba thina siye kubona.
"Usomnyama nje wazihlupha, yingakho besinaye ngoba sabahlunga nababefake izicelo,” kusho othe ukhulumela umnu Mthokozisi Zuma kuleli hhovisi.
Ubale neziteshi ebezinabasakazi abebeyizimenywa izolo nakuba bebengaqashiwe, egcizelela ukuthi bafela izono zabanye abantu abebehlela imicimbi phambilini. zowakha@ilanganews.co.za