Make sehlise ukubhala umculo onosizi - Wonder
Kakumele abantu bazizwe benosizi, kumele bagcwale indumiso
UWONDER B Mthembu, ongumculi we- gospel, uthi sekuyisikhathi sokuba amakholwa abhale umculo ojabulisayo nogcwele indumiso esikhundleni sokuba kugxilwe ezingomeni ezinosizi kakhulu.
Uthi kuningi okumele abantu bakubonge uma bebhala umculo, uthi ukuvuka ekuseni kuyinhlanhla engandele bani kukodwa.
Uma abantu belalele umculo wokholo uthi kakumele bazizwe begcwele usizi, kodwa kumele bagcwale ukubonga.
Uwonder ongowokuzalwa emtubatuba, kodwa osezinze egoli ngenxa yomsebenzi awenzayo wokucula, uthi emuva kwesikhathi eside eyibacking vocalist, eminyakeni emithathu eyedlule, ukhethe ukuba azimele.
“Konke kuhamba kahle kakhulu. Ngonyaka owedlule bengenze i- live recording yealbum yami ebisegalleria
Event Venue, esandton. Abantu babephume ngobuningi bezongeseka,” kuchaza yena.
Kumanje uthi usededele i- single entsha esihloko sithi: "Ngofakaza". Ngale ngoma uthi uyabonga ngayo yonke into ayenzelwe ngumdali futhi uzofakaza ngayo. “Uma ngibheka lapho ngiphuma khona, ngiyazibuza ukuthi ngingahlala kanjani ngingashumayeli ngezimangaliso angenzele zona usomandla,” kuchaza uwonderboy.
Uthi abantu bayamukele kahle i- single yakhe, kanti ngenyanga ezayo (April) uzobe esekhipha i- album egcwele.
“Abantu mabalindele ugcobo, inkazimulo nomculo owehlukile,” kusho yena. Uthi umculo wakhe kawugxilile kwisigqi esisodwa. “Kangisiyena umuntu othanda ukugxila entweni eyodwa. Lokhu kungisiza ekubeni umuntu nomuntu akwazi ukuthola ingoma ezozwana naye kwi- album.
"Ungathola eyi- jazz, pop, soul
nolunye uhlobo lomculo,” kuqhuba uwonder B. Esikhathini esizayo uthi uzibona esabalala nakwamanye amazwe, akafuni ukugcina eningizimu Afrika kuphela. Uthi usewaqalile amalungiselo okuvakashela emazweni angomakhelwane. tzondi@ilanganews.co.za