Kubalulekile ukuya emtholampilo uma uvuvukele ngokweqile
Odokotela bathi kakuwelaphi umsuka wesifo ukugcaba
ZININGI izifo ezinhlobonhlobo ezihlasela abantu, kanti ezinye zazo ziye zingaqondakali kumuntu esesimhlasele.
Esinye salezi zifo abanye abantu abangaziqondi kahle, yileso esibizwa nge- elephantiasis, ephinde yaziwe nge- lymphatic filariasis. Umuntu osengenwe yilesi sifo, ubonakala ngokuba avuvukalelwe yizitho zomzimba ngendlela engajwayelekile, imvamisa okuba yimilenze nezingalo.
Isikhumba naso kuleyo ndawo ethintekile siyaqina, sibukeke cishe njengesikhumba sendlovu.
Kubikwa ukuthi kuyenzeka ngesinye isikhathi kuze kuvuvukale nesitho sangasese namabele.
Ngokombiko we-world Health Organization (WHO), ngabantu abayizigidi ezingu-856 emazweni angu-52 emhlabeni wonke abasengcupheni yokuhlaselwa yifilariasis lymphatic, abadinga ukwelashwa kwamakhemikhali okuvimbela ukusabalala kokutheleleka ( infection).
SIDALWA YINI LESI SIFO?
Ngokujwayelekile i- elephantiasis idalwa ukulunywa kakhulu ngomiyane isikhathi eside ezweni lapho kuba khona uhlobo thizeni lwezikelemu oluhlasela ezilwaneni.
Iqala uma ulunywe wumiyane onamaqanda ezikelemu, nokwenza ukuba lawa maqanda akhule emigudwini yegazi.
Ayaqhubeka akhule asabalale emigudwini yonke yegazi esemzimbeni, kanti futhi angahlala kuyona iminyaka aze adale nomonakalo omkhulu kule migudu, bese kuba nokuvuvukala.
Nakuba sikhona eningizimu Afrika, kodwa sande ezingxenyeni zomhlaba ezisondelene nenkabazwe ( tropical and subtropical areas).
Udkt Nhlakanipho Gumede echaza KWILANGA Langesonto,
uthi lesi sifo sidalwa yizinto eziningi, okubalwa kuzo nokungagelezi kahle kwegazi emzimbeni.
“Abantu abaningi bajaha ukuselapha ngokugcaba ngoba bebona ukuvuvukala kanti sifuna umtholampilo ngqo,” kuchaza udkt Gumede.
Uphinde waveza ukuthi kukhona esinye isifo esehlukile okuye kwenzeke abantu basiphambanise ne- elephantiasis. Leso uthi yi- deep vein thrombosis (DVT).
“Nayo i- deep vein thrombosis
ingukuvuvukala kwemilenze, kodwa umehluko ukuthi ayenzi imilenze kube ngathi inamafindo namaqhuqhuva njenge- elephentiasis,” echaza.
Uphinde wachaza nokuthi leli gama elithi elephantiasis, lisuselwa egameni elisho phecelezi ‘ big’, okusho ubukhulu, nokuyilona elenza kucace ukuthi yinto enobukhulu phakathi.
IZIMPAWU ZAYO
Kubikwa ukuthi ngeke wazi ukuthi une- elephentiasis uma kungakafiki esigabeni lapho uzithola uvuvukala khona ngokweqile noma ngokungajwayelekile kulezi zitho zomzimba ezibalulwe ngenhla.
Okunye futhi, akugcini ngokuba lezi zitho esizibalulile zivuvukale noma zibe nesikhumba esiqinile, kodwa kuba khona nobuhlungu kulokho kuvuvukala okuhambisana nokuqina. Kuyenzeka futhi umuntu abe nokugodola, aphathwe nawumkhuhlane noma angazizwa nje kahle emzimbeni uma ungenwa yilesi sifo.
ONGAKWENZA UMA UNEZIMPAWU ZE-ELEPHANTIASIS
Geza womise indawo evuvukele nsuku zonke
Sebenzisa i- moisturizer (imithi yokugcoba) ukuze kwehle ukuqina
Zivocavoce uma uthola ithuba. Uma izingalo noma imilenze ivuvukele, zisekele uma ulele noma uhleli, zithi ukuphakama.
UKWELASHWA KWAYO
Ngokocwaningo, i- elephantiasis ayelapheki, kunemishanguzo ekwaziyo ukusiza ekwehliseni ukuvuvukala, ithambise nesikhumba sikwazi ukuphinde sibukeke njengesejwayelekile.
Eminye yale mishanguzo okubikwa ukuthi ayikatholakali eningizimu Afrika, yi- diethylcarba
mazine (DEC) ephuzwa kanye ngonyaka. Lo mshanguzo kubikwa ukuthi ubulala izikelemu noma amaqanda azo emigudwini yegazi.
Enye yezindlela zokwelapha lesi sifo, ukuxuba i- diethylcarba
mazine ne- ivermectine. Nawo lo mshanguzo uphuzwa kanye ngonyaka, futhi nocwaningo selutholile ukuthi le mishanguzo isidambisa ngokushesha lesi sifo uma ihlanganisiwe.
UKUPHILA NALESI SIFO
Kubikwa ukuthi kungenzeka simenze akhubazeke omunye umuntu. Kungaba nzima ukunyakazisa isitho somzimba esithintekile, okusho ukuthi kungaba nzima ukusebenza.
Lesi sifo futhi kungenzeka siholele ekubeni umuntu abe nokukhathazeka ( anxiety) noma ingcindezi ngenxa yokucabanga kakhulu ukuthi abantu bathini ngaye uma bembona.
Amaqanda ezikelemu ayasabalala emigudwini yegazi.