ESKHALENI:
NGIYAZWELANA kakhulu nezisebenzi zekwazuluNatal Athletics (KZNA) ezingaholile kuze kube manje ngenxa yezinkinga ezingahlangene nabo.
Uma usebenza kunezinto eziningi okufanele uzikhokhele uma kuphele inyanga ngoba uma wehluleka ukwenza lokho ugcina usunezinkinga eziningi njengokuthi igama lakho libhaliswe kubantu abakhokha kabi.
Ukube IKZNA eholwa ngusello Mokoena yakwamukela ukumiswa kwayo yi-athletics South Africa, ngabe izisebenzi kazikho kulolu bishi ezibhekene nalo.
Ngithuke kakhulu ngeledlule ngihambele ispecial General Meeting (SGM) ebesibizwe nguMokoena nengxenye yamalungu EKZNA angahambisani nokumiswa YI-ASA bethi akekho umuntu
onelungelo lokubamisa.
Bebeziseka ngokuthi bona bavotelwa ngamakilabhu yiwona kuphela angakwenza lokho.
Umbuzo engisale nawo ngothi ngubani kanti ophethe omunye.
Kuzokhumbuleka ukuthi ngo2009 ngesikhathi ucaster Semenya ebuya nendondo yegolide kwiInternational Association of Athletics Federations (IAAF), isascoc okuyinhlangano engamele ezemidlalo eningizimu Afrika, ithathe isinqumo sokumisa yonke ibhodi YE-ASA ebiholwa nguleonard Chuene ngaleso sikhathi kwafakwa umlawuli ozimele uraymond Mali. Uchuene nebhodi yakhe kabagolozanga bakwamukela ukumiswa kwabo.
Akugcinanga lapho, I-IAAF imise irussia iyisola ngokungabi nendlela ehlelekile yokuhlola abasubathi. Sekungumlando manje ukuthi iningi labasubathi baserussia ababanga yingxenye yemidlalo yama-olympic Game ka-2016 abesebrazil kanti iningi labasubathi bakuleliya lizwe bagcine ngalowo nyaka ukubamba iqhaza kwicomrades Marathon.
Ziningi izibonelo engingabhala ngazo lapho izinhlangano zimisa lezo ezingaphansi kwazo.
Kuyamangaza ukuthi IKZNA igoloza ngaliphi ukulalela umyalelo WE-ASA.
Kumanje kuneqembu lesifundazwe elibambe iqhaza emidlalweni yetwizza ASA U/18 and U/20 Track and Field Championships eligcine lihanjiswe ngumlawuli ozimele uray Reddy ebambisene netask Team.
Ngiyishayela elikhulu ihlombe itask Team ngokuqinisekisa ukuthi akushayeki abasubathi ngenxa yalo mdonsiswano oqhubekayo. Ngenyanga ezayo kunemidlalo yamasenior egermiston futhi ngijabule ukuzwa ukuthi itask Team noreddy bazoqinisekisa ukuthi abasubathi bayahamba ukuyomela isifundazwe.
Ngikholwa wukuthi ukube ugoodman Cele oyimenenja yekzNA wawalalela amakilabhu mhla ecela ISGM, ngabe izisebenzi aziphethe ziholile.
Kumanje ucele usephenduke isitha kwizisebenzi aziphethe ngoba imiholo yazo ziyifuna kuyena.
Kumanje akalali wehla uyenyuka ubhalela itask Team izincwadi ecela le mali ekhishwe ngamakilabhu ethenga amalayisensi.
Okudumazayo wukuthi ngabantu abaneminyaka kwezokugijima laba abasho kugcwale umlomo ukuthi I-ASA kayinawo amandla okubamisa. Abanye balaba bantu kuthi sebebodwa bafonele itask Team bacele amalayisensi kodwa uma behlangene nomokoena bacula elinye iculo.
Uma uvotelwe usuke umele lowo muntu okuvotele. IKZNA ivotelwa ngamakilabhu ahlanganile mhla ka-23 kunhlolanja (February) athatha isinqumo sokuyimisa yonke ibhodi njenge-asa, nawo angahlonishwa.
Bengicela kubantu abaphethe ukuba baqinisekise ukuthi kuyo yonke into abayenzayo akuphazamiseki abagijimi kanjalo nezisebenzi. Nazo izisebenzi azingathathi uhlangothi oluthile kulolu daba.
Nginethemba lokuthi lo mhlangano ozokuba khona phakathi kwetask Team nezisebenzi uzothela izithelo ezinhle, igcine ilungisekile indaba yamaholo azo izisebenzi kuphinde kucace nangekusasa LEKZNA.