UKHOZA UDINWA YIMIBIKO YOKUGWAZELWA KONONDWEBA
USIHLALO wepremier Soccer League (PSL) u-irvin “Iron Duke” Khoza ( osesithombeni) uphawula ngenkohlakalo okunamahlebezi okuthi idla lubi ngalesi sikhathi sesizini eligini yakuleli.
I-absa Premiership ibalwa namaligi amakhulu emhlabeni.
Isizathu salokho yindlela emakethwe ngayo, ngabaxhasi abaseqophelweni eliphezulu, yizinga le bhola njengoba kuvela ukuthi amakilabhu akuleli asekwazi ukuheha abadlali base-europe ngenxa yokuthi kuholwa kahle nokunye.
Sekuyinto ejwayelekile ukuthi uma isizini isizophela kube neziwombe lapho kusolwa khona amakilabhu athile ngokugwazela onondweba ngenhloso yokupheka imidlalo.
Amanye kuvela ukuthi athenga abadlali bamaqembu athile ukuze badedele imidlalo.
Engxoxweni ukhoza abe nayo naleli phephandaba ngolwesihlanu ekuseni, uthe ayikho into emnyanyisa njengokuzwa ukuthi kunamakilabhu agwazela onondweba ngenhloso yokuba bapheke imidlalo.
“Uma kungukuthi ngempela le nto iyenzeka angifuni ukuqamba amanga, iyanginyanyisa ngiyafisa ukuthi kube khona obanjwayo khona sizokwenza ngaye isibonelo.
"Le ligi kusetshenzwe kanzima ukuze ibe lapho ikhona, kuvele kunginyanyise uma ngizwa ukuthi kunabantu abenza le mikhuba.
"Le nto iyisifundo esibi kabi futhi yenza ngibone ukuthi abantu sebefelwe ngonembeza.
"Uma kukhona ngempela abayenzayo le nto abayiyeke ngoba bazoba senkingeni.
"Ujabula kanjani uthi uwinile ube ukade ugwazile?
"Le nto iyafana nomuntu oziphophothe ubuso ahambe enconywa kuthiwe muhle ebe azi ukuthi ngaphansi kwaleso siphophotho kukhonani.
"Ingizwisa ubuhlungu le nto ngiyafisa nje ukuthi uma kukhona abayenzayo bayiyeke ngoba yehlisa isithunzi seligi,” kusho ukhoza obezwakala ukuthi iyamcasula le nto.
Limbuza leli phephandaba ukuthi ngabe azikho yini izinhlelo abanazo zokubamba laba okuthiwa benza lo mkhuba uthe: “Kwesinye isikhathi uye unganaki ngoba wazi ukuthi usebenza nabantu abathembekile.
"Kodwa ziningi izinto ezibuye zingisolise ukuthi kukhona umkhuba owenziwayo konondweba.
"Buka nje ikilabhu yami ivele inikwe amakhadi abomvu ngendlela engaqondakali. Le nto ivele ingivezele ukuthi kukhona okushaya amanzi.
"Kukhona esiphezu kwakho uzozwa ngoba seziningi izikhalo sizithola.
"Kuzothuka abantu abaningi siphenya abantu izinqe zihlale obala.
"Phesheya abanaso isikhathi sokudlala uma wenza into ebhedayo bayakuxosha nathi-ke sizophoqeleka ukuthi kube khona esikwenzayo ukubamba izigilamkhuba,” kusho ukhoza.