UVULE ELOKUHLUKUNYEZWA NGOKOCANSI UMLINGISI
UVELE akhihle isililo umlingisi osafufusa uma ekhuluma ngathi kumehlele ngasekupheleni konyaka odlule esezindlini okuqoshelwa kuzo umdlalo odumile kumabonakude imbewu: The Seed, okhonjiswa kwi-e.tv, kugamenxe ihora lesi-9 kusihlwa.
Usimthande Myeza, obuye asakazele nesiteshi samakholwa iradio Khwezi, usola osebenzela ibecky Casting Agency, enikezela ngabalingisi abengeziwe ( extras) kulo mdlalo, ngokumhlukumeza ngokocansi ziyi-13 kulwezi (November). Uthi okwenza asukume manje wukuthi sekuvele nabanye abakhala ngalesi sisebenzi esibhekelele izindaba zale agency ethekwini njengoba yona izinze egoli.
Uthi lo mlisa (esiligodlile igama lakhe) asemvulele icala emaphoyiseni, ubehlekisa ngaye, ethi ungumfana othambile, embuza nangobulili bakhe.
Uqhuba athi, lo mlisa umdonsele esihlalweni, wawela emathangeni embuza ukuthi ufisa bani phakathi kwakhe nowesifazane obeseduze. Uthi umbikelile umnikazi wale agency, ubekezela Dube, kodwa naye wamphendula ihlaya.
“Inkinga sibasha embonini, manje siyesaba ukukhuluma ngoba sesaba ukuvaleleka. Ubesebenzisa ukuthi ngibukeka ngigay ukungehlisa isithunzi njengoba eze wangidonsela emathangeni.
“Ungifonelile esezwile ukuthi ngivule icala ebuza ukuthi ngiyeza yini kwi- workshop ngamtshela ukuthi ngeke ngikwazi njengoba angikhipha kwi- group kawhatsApp, wase ethi uzongibuyisela, angize kodwa ngenqaba,” usho kanje.
Umnikazi wale agency ukuqinisekisile KWILANGA Langesonto ukuthi uyalwazi udaba lukaSimthande.
“Wangitshela ukuthi uzizwe ehlukumezekile ngoba eyisitabane,” kusho ubekezela.
Ube esetshela leli phephandaba ukuthi usola ukuthi kukhona abathile abaqonde ukulwisana naye uqobo (ubekezela), manje kusetshenziswa umyeza.
ULT. Col. Thulani Zwane, okhulumela amaphoyisa, uliqinisekisile icala lokuhlukunyezwa ngokocansi elivulwe ekranskop, wathi idokodo liyiswe embilo ukuze liphenywe.
Abembewu bagcine bengaphefumulanga ngalolu daba.
Inkinga sibasha embonini, manje siyesaba ukukhuluma ngoba sesaba ukuvaleleka.