Uyaveva ozibone kwi-music video
Uthi kuthiwe mabesule emsebenzini uma binenkinga
IYAVEVA intokazi ethuke izibona kwi- video yengoma kadj LAG esihloko sithi, “Jika”, ehlanganisa nobiggie. Ubongi Sosibo, obesebenza endaweni yokujuxuza irich Dbn, utshele leli phephandaba ukuthi iyamnenga eyokuzibona kule video
njengoba engakaze atshelwe ukuthi uzovela kuyona.
Uthi ubesebenza njengoweta kule ndawo yobumnandi kodwa wagcina ngokwesula ngenxa yokungathathelwa phezulu kwesikhalo sakhe sokubonakala kule video.
Ekhuluma NELANGA LangeSonto, ubongi uthe yena nabanye ozakwabo abathathu abesebenza nabo kule ndawo, abazange batshelwe ukuthi bazobonakala kwivideo yale ngoma esisatshalaliswe nakuyou Tube.
“Thina safika sizosebenza ngokujwayelekile, akekho owasho ukuthi njengoba sisebenza sizobonakala ezingomeni. Sethukile sitshelwa ngabantu ukuthi kunevideo esivela kuyo,” kusho le ntokazi.
Ngemuva kwalokho bazamile ukulusukumela lolu daba kodwa kwangalunga.
“Sixhumanile NOLAG sathola ozibize nge- manager yakhe, sathi uma sizwakalisa ukukhala kwethu wazihlangula wathi, masixhumane nobeqopha i- video, ujorsen Milton.
“Sizamile ukuxhumana naye waqala ngokuthi uzosikhipha kodwa ngokuhamba kwesikhathi wasitshela ukuthi wakhuluma nathi savuma,” kusho le ntokazi ebizwakala ukuthi isanengekile.
Ithi ngemuva kokwehluleka ukuthola usizo, badlulele kubaphathi babo erich Dbn kodwa nakhona kwanhlanga zimuka nomoya.
“Okusikhathazayo wukuthi abaphathi basitshele ukuthi uma sinenkinga nokuvela kule video
masisule emsebenzini njengoba sigcine senze njalo,” kulanda yena.
Ukgolo Mthembu, ongumphathi werich Durban, uthe akanalo ulwazi ngalolu daba kodwa wathembisa ukuluphenya.
“Asikho isisebenzi esingaphoqwa ukuba sisule emsebenzini
uma sizwakalisa ukukhala kwaso. Siyinkampani eyilandelayo imigudu yezokusebenza ngakho uma ikhona into enjalo kwizimenenja zami kungaba yinto ephambene nomthetho, kungamele sithathe izinyathelo,” kusho ukgolo.
Ngemuva kwesikhashana uphinde wabuyela entathelini wathi akutholayo wukuthi zikhona izisebenzi ezimbili ezesulile emsebenzini kodwa azihambanga ngoba zingeneme.
“Okuvelayo wudaba lwezisebenzi ezimbili ezesulile ngenxa yezinye izinto eziphathelene nokukhula kwazo njengoba omunye wazo ubethweswa iziqu namhlanje (ngolwesihlanu),” kusho ukgolo.
Abaphathi basitshele ukuthi uma sinenkinga ngokuvela kwi-video, masisule.