Ukhala uyazithulisa UDJ wasepmb
Uthi i-ambitiouz Records inqwahe nemali yakhe
UMCULI wegqom, ozakhele igama ngengoma esihloko sithi: “Gobisiqolo”, obesengozini yemoto, ubambe umoya, ukhulekela ukuba kululame owesifazane abehamba naye, okunguyena olimale kakhulu.
Ubhizar, ogama lakhe langempela ngusbonelo Dimba ( osesithombeni) wehlelwe yingozi yemoto enyantisa igazi ngoLwesibili entathakusa emgwaqweni owuthelawayeka, u-n2, elibangise kubo emgababa, ephuma ukuyosebenza. Ubehamba ngemoto yakhe yohlobo lwetoyota Etios nabesifazane ababili ababize ngabangani bakhe. Yena usheshe wadedelwa esibhedlela njengoba ethi ulimale engalweni kuphela. Utshele leli phephandaba ukuthi akanandaba nokuningi, kodwa imikhuleko yakhe uyibhekise kulo wesifazane obambekile esibhedlela. “Njengamanje ukulimala kwami akubalulekile kakhulu kodwa engikufisayo ukuba kululame lo olimele kakhulu. Okubuhlungu ukuthi ulimale ekhanda,” kusho yena.
Uthi ingozi yenzeke ngesikhathi ezama ukudlula iloli ebelithwele izingodo kodwa lazithela kuyena.
Lo wesifazane olimele welashwa esibhedlela sikahulumeni, emshiyeni, emlazi. “Ukube kuya ngami ngabe ngimthuthela esibhedlela esizimele ukuze ezothola ukwelashwa okungcono,” esho.
Omunye wesifazane abebehamba naye akalimalanga kakhulu.
UKHALA ezimathonsi UDJ othi uqolwe yinkampani eqopha abaculi, i-ambitiouz Entertainment, imali engango-r75 000.
U-DJ Stibobo, ogama lakhe langempela ngusenzo Mbeje, uthi wayeqashe u-emtee ukuba ayonandisa emcimbini, imgungu Zwakala Picnic, owawumhlaka 16 kuzibandlela (December) ngonyaka owedlule, e-alexandra Park, emgungundlovu.
Uthi akazange alubhade u-emtee kulowo mcimbi nakuba wabe esekhokheliwe yonke imali eyayibizwe yi-ambitiouz Entertainment, waze waqashelwa nomshayeli ayezohamba naye uma esefikile.
Uthi le nkampani ayikaze itshengise ukuzisola ngesenzo sayo, kunalokho iyamziba.
“Ngemuva kokungafiki kwakhe emcimbini kwakumele basinikeze incazelo kodwa bavele bazithulela nje sengathi akukaze kwenzeke lutho,” kusho yena.
Lo DJ uthi usezame kaningi uku
xhumana nabale nkampani kodwa akasizakali. Omunye walabo ayexhumana nabo ugcine esemziba.
Uthi bake bazama ukumncenga ukuba enze omunye umcimbi ukuze u-emtee ezofika azodlala mahhala kodwa wabatshela ukuthi kuyabiza ukwenza umcimbi.
“Anginamali mina kanti nalo mcimbi ngiwenza kanye ngonyaka, manje bengingeke ngibe nayo imali yokukhokha izindleko zomcimbi omusha, yingakho ngibatshelile ukuthi kungcono bangibuyisele imali yami,” esho.
Uthi bavuma ukuthi bazoyibuyisa. Muva nje uthi ubesexhumana nomnikazi wenkampani, ukgosi Mahumapelo, naye athi ugcine esemziba.
“Ukgosi wangicela ukuba ngimthumelele yonke imiqhafazo ebesixhumana ngayo nezimenenja zakhe ngoba yena ubengazi lutho ngalolu daba. Akungisizanga-ke lokho ngoba akakaze ayiphendule yonke imiqhafazo ebengimthumelela yona,” esho.
Ekhuluma neLANGA Langesonto, ukgosi uthe uyalwazi lolu daba, umatasa uzama ukululungisa.
“Phambilini bengingenalo ulwazi ngalo (udaba) kodwa ngithe uma ngiluthola ngabona ukuthi wudaba oluncane, ngizolulungisa,” kusho ukgosi. Uphinde wathi bekungamele aze aluyise emaphepheni lolu daba ngoba ubezolulungisa. Ngemuva kwesikhathi esingangesonto ILANGA Langesonto likhulumile nokgosi wathembisa ukuthi uzolulungisa udaba, UDJ Stibobo uphinde wafonela intatheli ekhala ngokuthi ukgosi akakaze axhumane naye. “Namanje angikakayitholi imali futhi imiqhafazo yami uyayithola kodwa akayiphenduli,” kusho ustibobo. Ustibobo uthi udaba useludlulisele kummeli wakhe.