Usazogxila emkhakheni wobumnandi umfundisi
Uzobonakala kwi-lockdown kanti usejoyine nezithuthuthu
MFUNDISI osezakhele igama emkhakheni wezokungcebeleka uthi akukho okuphambene nenkolo ngempilo ayiphilayo. Usakhile Langa, ongumfundisi webandla lodumo Ethekwini Community Church, ophinde azwakale emsakazweni ivuma FM njalo ngesonto futhi osanda kungena kwezokulingisa, uthi labo abaxakwa wukuba kwakhe kwezobumnandi banenkinga.
Uthi ukuba wumfundisi akumvimbi ukuthi aphile impilo yakhe ngendlela afisa ngayo. Uqhubeka athi ngaphambi kokuthi abantu babe nenkinga ngaye nobumnandi kumele bakuqonde ukuthi njengoba enenkontileka yomsebenzi nomasipala wetheku, omunye wemisebenzi yakhe wukuqinisekisa ukuthi lo masipala uxhumana ngendlela nezinhlaka ezisebenzisana nawo.
“Esikhathini esiningi uma ngisemcimbini, ikakhulukazi kamasipala, ngisuke ngisebenza, hhayi ukuthi ngisuke ngihambele ubumnandi.
“Angiphiki ngiyazihambela izindawo zobumnandi, akusho ukuthi njengoba ngingumfundisi akumele ngijabule nabanye abantu,” kusho lo mfundisi enanela ngokuthi uma ehambela lezi zindawo akuchazi ukuthi wenza okuphambene nemithetho yenkolo yobukristu.
Umfu Langa uthi kuningi asazimisele ukukwenza emkhakheni wezikaqedisizungu njengoba ebuye aphathe izinhlelo emicimbini eyahlukene kanti ukubonakala kwakhe emdlalweni ophele ngeledlule ihostela kumvulele nelinye ithuba njengoba esezobonakala komunye umdlalo okhuza ibuya kumabonakude, ilockdown.
Uthi ukuthokozele ukuqopha lo mdlalo kanti usezimisele ukukuthathela phezulu ukulingisa.
“Ngikhuluma nje ngisezinhlelweni zokuthola inkampani ezongitholela imisebenzi kwezokulingisa. Ngiyabonga kakhulu kubakhiqizi belockdown ngokubona ikhono ebengingalinakile,” kusho umfu Langa, osengene kwi- club yezithuthuthu.
Uthi kule club uyisekela likamengameli weqembu elibizwa ngedurban Bikers Club. Uthi uyazifela ngezithuthuthu.
Uzobe engomunye wabaphathi bohlelo emcimbini wephasika obizwa ngovukile
Gospel
Festival.
Umfu
Langa osedume ngelikamhlonishwa, okuyigama aliqanjwa ngubhululu wakhe ucalvin Ntenga, uthi unamadodana amabili kanti akakashadelwa selokhu ahlukananisa nomkakhe. Uthi njengoba eneminyaka engu-41 kulo nyaka, uzimisele ukuthatha inkosikazi uma esenemika engu-45 ubudala. Utshele leli phephandaba ukuthi akaziboni evula elakhe ibandla njengoba eveza ukuthi akulona ubizo lwakhe ukusungula ibandla. Uthi usakuthokozela ukukhonza ngaphansi kwesandla sikabhishobhi Vusi Dube amthatha njengomngani wakhe omkhulu. Uphethe ngokuthi nakuba kuyinto esekude emqondweni wakhe kodwa uzimisele ukuthi ngokuhamba kwesikhathi akhipha i-albhamu yomculo we- gospel.