Ayinqindwe amandla I-ANC
MHLELI, kwelapho elihamba phambili, ngithi ake ngisike elijikayo ngesimo engisibona siyingozi, izwe lobaba mkhulu elingase libhekane naso ngaphansi kobuholi bukaKhongolose.
Eminyakeni ethi ayibe wu-25 iningizimu Afrika yathola inkululeko, ziningi izigameko ezinhle nezimbi izwe eselidlule kuzo ebuholini bomengameli abathathu beANC.
Kunefu elimnyama lenkohlakalo eligubuzele ukhongolose selokhu angena ezintanjeni zombuso. Umbuzo engizibuza wona manje uthi: “Ingabe kuyofika u-2024 sinjani isimo kuleli lizwe uma umphakathi uwuphinda ngamandla (ukhongolose) okuhola uhulumeni emuva kokhetho?”
Umbono wowabe engumengameli, umnu Kgalema Motlante wokuthi leli qembu liyadinga ukuphuma emandleni ukuze lizibone amaphutha alo eliwenzile kuyona yonke le minyaka, ngiwubona umuhle futhi uzosiza yona uqobo I-ANC.
Abaholi bakakhongolose, ikakhulukazi laba bamanje, abanendaba nenhlangano, kodwa babeka izisu zabo phambili. Lokho kufakazelwa wukuthi noma sekuyisikhathi sokuthi kube khona ushintsho ngaphakathi kuyona I-ANC, akwenzeki, abawalaleli amalungu abo emagatsheni kanjalo nabantu abayivotelayo.
Amahemuhemu ngohlu lwabantu abazoyimela ephalamende likazwelonke kanjalo nasezishayamthetho libuyisa amakhehla namakhehlekazi asefanelwe wukuhlala phansi.
Lokho-ke kukhombisa ngokusobala ukuthi cha inhlangano le ibuswa ngogombela kwezabo futhi abalandelwa amacala enkohlakalo.
Ngiyabanxusa abantu ukuba bavule amehlo ngalo Khongolose, kungenjalo, siyokuyikhotha imbenge yomile. Bayolidayisa baliqeda izwe nomnotho walo, sisale sincela izithupha!
Angisho ukuthi abantu bamavotele inhlangano ethile yezepolitiki, okudingekayo nje wukuba sinqinde amandla lo ANC osuvele wonile kakhulu. Lokho kuyosiza thina kanjalo nabantwana bethu.
Sifiso Ngweza, emtwalume