Waya nengane egoli manje akasabuyi
NGIFUNA AKHOHLWE NGUMAKOTI WAKHE
NGINENKINGA yomuntu engithandana naye, ubenomakoti oseganile. Mina bese ngizoba ngowesibili. Lo makoti obesehlala ekhaya, ubengaziphethe kahle, ejola ngaphandle, exoshwa aphinde axolelwe, abuye. Usephinde wabanjwa futhi wabe esexoshwa.
Inkinga wukuthi ngiyabona ukuthi kulona wesilisa alupheli uthando lwalo makoti. Ngicela ukubuza ukuthi yini engingayenza ukuze kuphele uthando lwaloya makoti, kugane mina.
IMPENDULO: Ngiyaxolisa kakhulu, angikwazi ukukusiza ekutheni yini ongayenza ukuqeda uthando phakathi kwalo makoti nomyeni wakhe. Anginawo amacebo okukusiza enkingeni obhekene nayo.
Ngibona sengathi uzixaka ngendaba engakufuni yokuzama ukwenza le ndoda ikhohlwe yilo makoti. Okufanele ukwenze wukubhekana nendoda yakho, uyikhombise uthando, uyiphathe kahle, uyihloniphe, wenze konke okuzoyenza ikuthande, ikuhloniphe.
Isisho sesizulu sithi “Ingwe idla ngamabala”. Ngikholwa wukuthi uyakuqonda engikushoyo kuwe ngalesi sisho futhi uyazi ukuthi isizulu asitolikwa. Uma uqhubeka uziphatha kahle, uyinika konke ekudingayo, kwazi bani, ingagcina isikwenza inkosikazi yayo.
LUYANGEHLULA LOLU THANDO
UTHANDO lungehlule, bengizitshela ukuthi lo muntu ungumaqondana wami, kodwa ngenxa yenduku nenhlamba, hhayi ngiyehluleka. Khona ngisamthanda ubaba wengane yami, kodwa ngiyahamba - ngizoyincenga inhliziyo ukuba ixole. Angazi noma ngenza okuyikhona yini.
IMPENDULO: Dadewethu, ngiyakuncoma ngesinqumo osusithathile sokushiya phansi kulobu budlelwane okubona. Kusemqoka ukuba sifunde ukuzivikela ezimeni ezingezinhle singaze sehlelwe yingozi.
Akusizi ukubekezelela ukuhlukunyezwa mihla namalanga. Ukubekezelela ukuhlukunyezwa kuvamise ukuba nomvuzo omubi, ngesinye isikhathi ohambisana nokulahleka komphefumulo. Kwamukele ukuthi usamthanda kodwa ungaluvumeli uthando lukuvale amehlo uze uyophonseka eweni.
Njengoba usuthathe isinqumo sokumshiya usamthanda, kwamukele ukuthi ngezinye izikhathi uzomkhumbula, kufike izinyembezi. Ngiyakwethembisa ukuthi ngokuhamba kwesikhathi, leso silonda siyophola enhliziyweni, uziqhubekele nempilo.
ULETHA IZINTOMBI ZAKHE ENDLINI
NGINOBABA wengane ebese ngihlale naye iminyaka ewu-16 kodwa kuleyo minyaka, mine kuphela eba ngumuntu othembekile. Manje uyaqonywa bese eyamletha umuntu wakhe lapha, sihlale ndawonye khona endlini eyodwa, athi uzosihlanganisa, uma ngikwala lokho, angakwemukeli lokho.
IMPENDULO: Angiqondi ukuthi yini wena ekwenza uhlale naye ngoba akukho lapho kuvela khona ukuthi lo mlisa ungumyeni wakho, nishadile kodwa uthi unguyise wengane nje.
Ngesinye isikhathi ubuhlungu esibuzwayo siyazifaka kubo, kuthi noma sesibuzwa ubuhlungu kodwa siqhubeke sihlale dekle, singafuni ukuqhela.
Iphutha elivamise ukwenziwa ngabanye abantu besifazane ukunikela ngempilo yabo kubantu besilisa ekubeni umuntu engakhishelwe lutho. Omunye uze athwale imithwalo aphume ekhaya ayohlala nendoda engamkhiphelanga ngisho isenti.
Uma wenza kanjalo usuke uzinikela ekutheni umuntu adlale ngawe. Into engingakutshela yona wukuthi akumele uhlale lapho ongathokozile khona ngoba ngolunye usuku bayokwenza lukhulu.
UFUNA UCANSI NJALO
NGINGOWESIFAZANE osemncane, onesoka eliselincane futhi ngokweminyaka. Nginengane nalo, lifuna siye ocansini njalo ngeviki - ngivele ngikhathale.
Angazi noma ngilitshele kodwa ngiyesaba. Lumnandi lona ucansi.
IMPENDULO: Uzwakala ungumuntu ongazazi ukuthi ufunani. Ukhononda ngokuthi isoka lakho lifuna niye ocansini njalo ngeviki, wena uvele ukhathele kodwa futhi uthi lumnandi ucansi?
Manje ngiyadideka mina ukuthi yikuphi kahle hle okufunayo. Mhlawumbe engingakusho nje wukuthi uma kukhona into ongayifuni eyenzekayo ebudlelwaneni, ubokhuluma, ungafeli ngaphakathi.
Uma kuwukuthi lo mfana akakulobolile, angikholwa wukuthi kuwumqondo omuhle ukuba unikele ngomzimba wakho ngoba kuyokwenzeka kusasa akushiye, bese uyazisola.
WAHAMBA NENGANE, AKASABUYI
NGINENKULU inkinga, ngathandana nomuntu saze sathola ingane, wabe esecela ukuyohlala nayo egoli, ngavuma. Selokhu ahamba nayo ngo-2015, akasabuyeli emakhaya, manje angisazi ukuthi ngizomthola kanjani noma ingane isaphila noma cha.
Ngabe kwenziwa njani uma kunje? Nenombolo yakhe yocingo angisenayo. Ngicela ningibonise, ngenze njani?
IMPENDULO: Le ndaba yakho ingishiya nombuzo wokuthi wena wavuma kanjani ukunika umuntu ingane ukuba ahambe nayo egoli lapho ungazi khona?
Kwenziwe yini ukuba kuze kuphele isikhathi eside kangaka ungazami ukuxhumana naye, ukuze uhlole ingane yakho.
Ngabe bathini abakubo noma izihlobo zakhe? Ngicabanga ukuthi into engakusiza wukuthi uma wazi lapho ayesebenza khona uke uzame ukushayela khona ucingo, hleze bakusize.
Mhlawumbe futhi ungaxhumana nabomnyango wezenhlalakahle oseduze nalapho uhlala khona, kungenzeka bakwazi ukuxhumana nozakwabo egoli, bakufunise ingane.
Omunye umzamo ongawenza wukuba uxhumane nabekhumbul’ ekhaya kule mininingwane: Email: khumbulekhaya@sabc.co.za Fax: 086 511 7440
Ikheli: P/bag X 345 Melville 2109