Ingqophamlando yombhoxo nezokugijima
Imizamo ecishe ifane seyake yafeyila Kwazulu-natal
KUHLELWE indumezulu yemidlalo ehlanganisa ezokugijima nebhola lombhoxo ezokuba ngoMgqibelo ozayo womhla ka-13 kwephezulu emangaung, efree State.
Le midlalo ihlelwe yi-athletics South Africa (ASA) nepro 14 Rugby. Ngokusho kwalezi zinhlangano, kuzokube kungokokuqala ukuba ezokugijima zihlangane nabebhola lombhoxo.
Kwezokugijima kuzokube kuga
duliswana emlenzeni wokuqala we-athletics Grand Prix kanti ebholeni lombhoxo kuzokuba wumdlalo phakathi kwetoyota Cheetahs newelsh Dragons yaseWales.
Le midlalo kulindeleke ukuba ibe sezingeni eliphezulu. Kuthiwa kuzoqala ngomdlalo webhola lombhoxo bese kulandela igrand Prix.
Kuzokhumbuleka ukuthi imidlalo yegrand Prix izokuba yimilenze emibili. Olandelayo uzokuba mhla ka-18 kwephezulu epotchefstroom, enorth West.
Uma sekusongwe imidlalo yegrand Prix, kuzokuba neyesizwe Medical Fund & 3Sixtylife ASA Senior Track & Field and Combined Events Championships ezoqala mhla ka-25 isongwe mhla ka-27 kwephezulu egermiston.
Abasubathi abazokwenza kahle kule midlalo bazozibeka ethubeni lokumela iningizimu Afrika kwiInternational Association of Athletics Federation (IAAF) World Championships ngomandulo (September) edoha, eqatar.
Umengameli WE-ASA, u-aleck Skhosana, uthe kuqopheke umlando ngokuba le midlalo ihlangane.
Uthi ukuhlanganisa le midlalo kuzokuba yinto enhle efree State naseningizimu Afrika yonkana.
“Singakuthokozela uma nezinye izifundazwe zingasika iphethini kule midlalo esizokuba nayo ngempelasonto. Silindele izinga eliphezulu kuyo yomibili le midlalo.
"Kwezokugijima silindele abasubathi abaningi kwazise abanye bazobamba iqhaza kuyona ngenhloso yokuzibekisela indawo kumaworld Championships kanjalo nakumaOlympic Games.
"Kuzokuthi ngokuhamba kwesonto sikhiphe abasubathi abavelele abazobamba iqhaza kuyona,” kusho uskhosana.
Kwezokugijima kubhekwe abasubathi abafana nowayde van Niekerk ozinze khona efree State njengoba efunda khona. Uwayde ophethe irekhodi lomhlaba le400m, ubuye mawala njengoba kuthe ngenyanga edlule waba yingqwele kulo leli banga kumaChampionships efree State.
Lo msubathi ubenyamalele ngenxa yokulimala. Abanye ababhekiwe ngu-akani Simbine (100m), ucarin Horn ukubala nje abambalwa.
Eminyakeni edlule ikwazuluNatal Rugby Union yake yazama ukuhlela umdlalo kanobhutshuzwayo ukuvulela eyesharks kodwa lokho kakwaze kwaphumelela njengoba kwenzeka kanye nje vo kwazise kakuzange kwesekwe njengoba abagqugquzeli babelindele.