I-BAY IFUNA UKUFAKA USAWOTI ESILONDENI ESIBHIBHAYO SE-KINGS
BAFUNA ukufaka usawoti esilondeni esibhibhayo sereal Kings abadlali berichards Bay FC abazodudulana nayo emdlalweni wenational First Division (NFD) namuhla ngesonto ngo-15h00 emhlathuze Sports Complex, erichards Bay.
Usiyanda “Folweni Express” Ngubo ongumgadli webay FC, utshele ILANGA Langesonto ukuthi bafuna ukusebenzisa isimo sekings, edonsa kanzima kulesi sigaba, ngokubutha amaphuzu amathathu. I-kings isenkingeni njengoba ilwela ukuvika izembe. Uthi bakuqonda kahle ukuthi abadlali bekings bazokuza kulo mdlalo bexhamazela njengoba bevika izembe.
“Ngikholwa wukuthi lo mdlalo uzokuba nzima kakhulu ngoba sidlala nekilabhu evika izembe. Nokho-ke bazosithola kahle sibalindele ngoba nathi kasifuni kuphume lutho ekhaya. Emlenzeni wokuqala sibuye nephuzu, ngakho-ke ekhaya siwadinga ephelele amaphuzu.
“Kangikholwa wukuthi kukhona umdlali odinga ukugqugquzelwa ngalo mdlalo kwazise ngowomkhaya besifundazwe.
"Okubi wukuthi sizimisele ngokuyodlala imidlalo yokuhlungela ukunyukela esigabeni esikhulu.
"Kasifuni kube khona ikilabhu ezokuma endleleni yethu,” kusho ungubo.
Ubrandon Truter ocija ibay FC, ukhale kakhulu ngokulinyalelwa yinqwaba yabadlali. Uthi ulinyalelwe ngutshepo Mashego, ustanley Muishond, umpho Erasmus, ujunaid Sait nolionel Saal obuya esigwebeni samakhadi. Uthi bayawadinga kakhulu amaphuzu ukuzibeka endaweni enhle uma kuphela isizini.
Ukyle Davies oyisitobha sekings, ubalise ngobunzima balo mdlalo. Uthi bengabadlali bayakuqonda ukuthi yonke imidlalo esele isifana neyamanqamu. Uthi bazokuya kulo mdlalo bewavulile amehlo futhi bazimisele ngokungabaphoxi abalandeli bekilabhu abahlale beyeseka kukuhle kukubi.
Isiyonke imidlalo YENFD enamuhla ngesonto ihlelwe kanje:
E-athlone: Cape Umoya United vs TS Sporting 15h00.
Emhlathuze Sports Complex: Richards Bay vs Real Kings 15h00.
Emakhulong: Jomo Cosmos vs Stellenbosch FC 15h00.
E-ABSA Tuks: Pretoria University FC vs TS Galaxy 15h00.