ISILOMO SE-PSL SIGOLOZA UKUYEKISWA IBHOLA WUMNDENI
UGOLOZA ukuyekiswa ibhola umdlali wepolokwane City okuvela ukuthi uncengwa wumndeni wakhe ukuba adede ngenxa yokuthi usechithe iminyaka eminingi engahlali nawo kwazise uhlale esemgwaqweni.
Ipolokwane izobhekana nomkhaya iblack Leopards koweAbsa Premiership namuhla ngeSonto ngo-15h00 epeter Mokaba Stadium, epolokwane.
Leli phephandaba lihletshelwe yimithombo yalo ukuthi ujabulani Maluleke (37), odlala esiswini kule kilabhu, ubhekene nengcindezi endlini njengoba umndeni wakhe ufuna athi khumu ebholeni, kwazise sekuphele iminyaka eminingi engahlali nawo, ikakhulukazi ngezimpelasonto ngenxa yokuxinwa yibhola.
Kuthiwa umncenga ukuba agcine ngale sizini kodwa yena uyala. Kuvela ukuthi ipolokwane vele kunomsebenzi embekele wona ukumbonga ngokuwa evuka nayo kunzima. Lo mdlali uqale ukudlala esigabeni esikhokhelayo ngo-2005 egijima kwidynamos.
Uthi akakaziboni eyeka ibhola, usazoqhubeka nalo.
“Kunzima ukushiya umndeni wakho izimpelasonto zonke, naphakathi nezinsuku ngesinye isikhathi uyodlala, kodwa kufanele ukuqonde ukuthi yimpilo yami lena, yiyona into engikwazi ukuyenza kangcono. Ibhola ngisazoqhubeka nokulidlala, ngeke ngiliyeke. Njengamanje ngizizwa ngisengagijima amanye amasizini ambalwa, umzimba usavuma, kawukhathele nakancane,” kusho umaluleke.
Ephawula ngomdlalo wabo neleopards, uthe kuzoba wumdlalo onzima.
“Kuzoba wumdlalo omnandi womkhaya lona ngoba womabili amakilabhu kawakholelwa ekupakeni ibhasi. Nokho kakufanele siyithathe kancane le kilabhu ngoba nakhu ingomakoti beligi.
"Phela seyikhombisile ukuthi iyingozi ngaphansi komqeqeshi wayo omusha. Kuzofanele siyinike indawo yayo kodwa singakhohlwa wukuthatha amaphuzu amathathu kuyona ngoba phela sifuna ukusonga sikwi- top 8,” kusho umaluleke.
Umwape Musonda ongumgadli weleopards, uthe balindele umdlalo onzima komkhaya babo.
“Kumnandi ukubhekana nomkhaya ngoba kanidingi ukukhuthazwa ngumqeqeshi, imimoya ivele izikhuphukele yona ekhempini.
"Lo mdlalo kufanele sikuqinisekise ukuthi siyawunqoba ngoba kasikasindi ezembeni. Nginethemba lokuthi sizokwenza kangcono kakhulu kuwona,” kusho umusonda.