ESKHALENI:
KUSHIYA imibuzo eminingi ukutholwa kwemamelodi Sundowns inamacala yipremier Soccer League (PSL) ngesikhathi esibucayi kangaka sokusongwa kweAbsa Premiership.
Sonke siyazi ukuthi isundowns yenze iphutha ngokulanda uwayne Arendse ezihlweleni imbophele enkundleni ngemuva kokulimala kukathapelo Morena besazifudumeza ngaphambi komdlalo nebidvest Wits mhla ka-7 kumfumfu (October) nyakenye.
Kungani isundowns isitholwa inecala manje? Belingahlalelwa ngani lolu daba ngoba kade senzeka lesi sigameko?
Leli cala libucayi kakhulu ngoba mhlawumbe kungenzeka isundowns igwetshwe ukuphucwa amaphuzu noma iphuzu.
Okuphinde kushiye imibuzo wukuthi isundowns isembangweni wesicoco seligi ne-orlando Pirates eholwa ngu-irvin Khoza okunguyena futhi ongusihlalo WEPSL. Lokhu-ke kungabeka kabi ubuholi beligi ngoba kwabanye kungahumusheka ngokuthi busebenzisa amandla budlabha.
Kusekusha emiqondweni yabanye ukuthi isizini edlule isongwe kumuncu i-ajax Cape Town isolwa ngokudlalisa kungafanele utendai Ndoro.
I-ajax ibisolwa ngokubophela lo mdlali ekubeni esedlalele amakilabhu amathathu ngesizini eyodwa, okuyinto ephambene nemithetho yefederation of International Football Association (FIFA).
Okuqaphelekayo wukuthi emidlalweni edlalwe ngundoro, bekukhona nehlule kuwona ipirates ebisembangweni wesicoco seligi. Nayo ibucs ibiyingxenye yamakilabhu amangalele i-ajax ngokudlalisa undoro.
Ngemuva kokuba sekucaca ukuthi ipirates ngeke isinuke isicoco seligi, ilihoxisile icala.
Lokhu-ke nakho kungahumusheka ngokuthi leli cala belifakelwe ukulekelela ipirates ukunqoba iligi, njengoba namanje kwabanye kubukeka sengathi icala lesundowns lingeminye yemizamo yokucabela ipirates indlela ebheke esicongweni sepremiership.
Akubukeki kahle ukuthi njalo nxa sekuyosongwa isizini IPSL ihlale isezindabeni ngamacala ngoba lokhu kuhudulela odakeni isithunzi sale ligi ehamba phambili e-afrika.
Elinye icala elilahle idowns ngelithinta umqeqeshi wayo, upitso Mosimane osolwa ngokushaya isikhulu sonogada bosuthu nyakenye emlazi. Izigwebo zala macala yima zizophuma.