IJABULE YABUYA NGANENO I-PIRATES IQHWAKELA KWI-LOG
IBUYELE esicongweni se-log yeAbsa Premiership i-orlando Pirates iguqisa ibidvest Wits ngo1-0 izolo ngomgqibelo ntambama ebidvest Stadium, egoli.
Igoli lebucs lishaywe ngukeegan Ritchie okube wumkhonto ogwaze ekhaya ngesikhathi somusa kanondweba uvictor Hlungwane.
Ibucs idlale ibhola elisezingeni eliphansi kakhulu uma liqhathaniswa neligijime ibambana nemamelodi Sundowns ngo-0-0 ngomsombuluko.
Ibucs ibuyele esicongweni ngamaphuzu angu-44 emidlalweni engu-25. Ibambene ngamaphuzu nedowns esele ngomdlalo owodwa njengoba ibigijima umdlalo wecaf Champions League ebhaxabule kuwona i-al Ahly yaseEgypt ngo-5-0 izolo ntambama, etshwane.
Nokho-ke ibucs ijabule yabuya nganeno njengoba u-augustine Mulenga ongumgadli no-alfred Ndengane odlala emuva, bethole amakhadi abashovela ngaphandle emdlalweni weligi omqoka (ibucs) ezowugijima neblack Leopards ngolwesithathu ngo-19h30 e-orlando Stadium, esoweto.
Ibucs iye emdlalweni wayizolo zivele zinyomfekile izinhlelo zayo njengoba ebengekho uthembinkosi Lorch naye obedonsa isigwebo samakhadi.
Indawo kalorch ithathwe nguthamsanqa Gabuza ogcine ukuqala umdlalo ngoncwaba (August) nyakenye ibucs ibhekene neleopards. Kulo mdlalo ugabuza uxabane nabalandeli bepirates wabajikijela ngejezi ecikwa wukuthi bebemhhewula.
Ugavin Hunt ocija iwits, uqhamuke neqhinga lokuvimba ngqi ipirates ukuthi ingadlali ibhola elisheshayo.
Iwits ibinqoba kwasani esiswini, obekugcina kuphoqa ibucs ukwenza amaphutha awubungane. Igcine isiyenza ama- free kick ezindaweni ezibucayi, okuyinto ayithandayo uhunt. Iwits isihlohle inqwaba yamagoli ngama- free kick njengoba ive-le ikhuphule uthulani Hlatshwa-yo, ubuhle Mkhwanazi nosifiso Hlanti abakwaziyo ukuwangqofela enethini.